NABAG-OHAN ako dihang giingon ni Pangulong Rodrigo Duterte nga mahimong modawat ang mga pulis og regalo o salapi kung kini gikan sa pagkamanggihatagon sa tawo nga ilang naserbisyohan.
Ang pahayag sa Pangulo iyang giluwatan niadtong Biyernes, Agosto 9, atol sa iyang pagpamulong sa 118th Service Anniversary sa Philippine National Police nga gihimo didto sa Camp Crame.
“Hindi ko kayo iipitin, basta ‘pag bigyan kayo eh tanggapin ‘nyo. It is not bribery...it cannot be bribery because it is allowed by law. What I mean, if there is generosity in them, sabi ng anti-graft [law] you cannot accept gifts? Kalokohan,” suma ni Duterte nga napatik sa mantalaan.
Si Senador Panfilo Lacson mibira sab sa pahayag sa Pangulo tungod kay dayag kaayo kini nga supak sa balaod.
Apan gidepensahan kini sa Malakanyang pinaagi pinaagi sa pagsulti nga di kini dautan.
Suma ni Presidential Spokesman Salvador Panelo nga opisyal sa pulid mahimong modawat og regalo sa giingon nilang diyutay (nominal) nga kantidad basta di sobra (excessive) nga kantidad.
Daghan ang nangutana nako kung di ba supak sa balaod ang pagdawat og regalo sa opisyal o empleyado sa gobyerno.
Ako sab sila gitubag nga ilawom sa Republic Act Act 6713 kun Code of Conduct and Ethical Standards for Public Officials and Employees, ang mga opisyales ug empleyado sa gobeyrno di mag-solicit o modawat, direkta ug di direkta, og bisan unsa nga regalo gikan sa tawo sa paghimo sa ilang opisyal nga trabaho aron di maimpluwensyahan ang iyang desisyon pabor sa iyang kliyente.
Kung ako ang Pangulo, di nako kini isulti sa publiko kay mao kini ang magdasig kanila nga mahimong kurakot nga opisyales sa gobyerno.
ooOoo
Akong gitimbaya si Efraim Ramirez, usa sa mga organizers sa Lahong - Tribal Concert and Dinner For-A-Cause karong Agosto 18, 2019 sa UCCP Shalom Auditorium, Bonifacio Street, Davao City.
Ang kita ning maong aktibibad alang sa mga iskolar nga lumad dinhi sa siyudad sa Davao.
Sa P500 nga ticket, aduna ka nay native products ug accessories, makatabang pa kita sa mga lumad.