PURSIGEDO nga mopasaka og kaso ang Regulatory and Complaint Board (RCB) ngadto sa mga namalikas kanila atol sa gipahigayon nga operasyon niadtong Agusto 10 sa Cagayan Town Center, dakbayan sa Cagayan de Oro.
Nitumaw sa video sa nagpailang blogger nga Ton Escol Page diin namalikas ang usa ka nailang si “Andre” ngadto sa inspectorate team leader sa RCB nga si Antonio Resma Jr.
Sa pakighinabi kang Resma, gibutyag niini nga mopasaka siya og kaso.
“I am firm to file a case against that person. I want to send message to everyone. Nagtrabaho na ang gobyerno para sa inyo, inyo na hinuong mura-murahon, mao na akong gusto nga mensahe nga respetohan nato ang atong mga enforcers kay gatrabaho raman sab kita,” matud ni Resma.
Gidugang pa nga tan-awon pa usab niini kung dunay nalapas usab ang mismong nag-post sa maong video tungod kay wala kini palampason ilabi na tanang nanginsulto ug nag-istorya og law-ay batok sa RCB.
Giklaro usab niini nga dili personal nga kaila si Andre apan giingong kini usab gihapon ang nagmura kaniadto ug nag-ingong bugok ang RCB kini human nga gisunog ang mga nakumpiskang mga ilegal nga fireworks kaniadto.
Samtang nagpagawas og pahayag ang ulo sa RCB nga si abogado Edgardo “Egay” Uy sa pagsuporta ilabi na nga dili nila pasagdan ang mga aroganteng indibidwal kinsa naigo sa gipatuman nga regulasiyon.
“The guy who commented ‘F*ck you Resma’ went overboard and should be held accountable for his utterances. I understand Mr. Antonio Resma Jr will take legal action against the guy and we will support him all the way,” matud ni Uy.
Nasayran nga gipamugos sa mga nag car-tambay o nag-carshot nga dili sila angayang hilabtan tungod kay anaa kini sa pribadong lugar.
Samtang giklaro sa RCB kung unsa ang pampublikong lugar ug gani gihatag pa niini ang pasabot sa “public place” ug sa gi-isyu ni Presidente Rodrigo Duterte nga Executive Order No. 26.