USA ka sakop sa media ang gisikop sa kapolisan mga alas 9:30 sa buntag Martes, Agusto 13, sa Barangay 22-A, dakbayan sa Gingoog, Misamis Oriental.
Si Police Lieutenant Colonel Ariel Philip Pontillas miila sa dinakpan nga si Jonas Bustamante, 49, taga Barra lungsod sa Opol, Misamis Oriental.
Gilusad sa kapolisan ang oplan lambat sibat o pagsilbi sa warrant of arrest gumikan sa tulo ka ihap sa kasong libel nga giisyu ni Judge Giovanni Alfred Navarro sa Regional Trial Court-10 Branch 27 sa Gingoog City.
Matud ni Pontillas nga taod-taod na nga gipasakaan og kasong libel si Bustamante sa mga complainant nga sila si Gingoog City Councilor Marlon Kho ug usa ka Ronnie Waniwan ug wala nasab niini gisulti kon unsay ugat sa pagpasaka sa maong kaso.
Dugang ni Pontillas nga wala ra sab kini malangan sulod sa prisuhan gumikan kay pagka alas 1:30 sa hapon nakagawas kini human nakapiyansa og balor P45,000 kini kantidad sa tulo ka ihap sa kasong libel nga giatubang niini.