DAGHANG mga opisyal ang mikwestyon pagkasunog sa mga basura nga andam na untang ibalik sa nasod sa South Korea human nahidangat kini niaging tuig nga walay igong dokumento.
Nabalik na ang 1,400 tonelada niini niadtong Enero samtang moabot ngadto sa 5,000 ka tonelada sa basura ang wala pa nabalik ug niadtong adlaw’ng Lunes, Agusto 12, kalit miulbo ang kalayo sulod sa compound sa Verde Soko kon asa kini nahimutang diha sa Buguac, Barangay Sta Cruz lungsod sa Tagoloan, Misamis Oriental.
Dili tanan apan pipila ka mga basura ang nasunog human dali ra sab kining natabang sa mga bombero gikan sa nagkalain-laing fire station nga gilangkoban sa Bureau of Fire Protection sa lungsod sa Tagoloan ug Villanueva lakip ang fire volunteer gikan sa Jetti, Kurakios, Piemo ug PSC.
Nahimo sab kining kontrobersyal human ubay-ubay ka mga basurero ang misuway sa pagkawat sab sa mga basura sulod sa compound niaging bulan. Mismong si Phivedic Industrial Authority administrator abogado Franklin Quijano nihulagway nga “disturbing” nganong nahitabo ang sunod sulod mismo sa compound.
“When I heard about it last night it is very disturbing so we have it investigated and we will hope that all investigating unit will also join us in searching for the culprits if there are, my idea is sketchy. I ordered the safety and security division to make a thorough investigation,” matud ni Quijano adlaw’ng lunes atubangan sa prensa atol sa ika 45th anniversary sa Phivedic.
Si Misamis Oriental Governor Bambi Emano naghangyo sab ngadto ni Sangguniang Panlalawigan Board Member Gerardo Sabal nga paimbestigahan kini tungod kay posibleng adunay nagpaluyo sa pagkasunog sa basura nga unta ibalik na sa South Korea.
“I can smell something fishy. Compound baya kana! Imposible nga masunog, sayonan ka nga kalit lang masunog ang basura nga walay tao? Imposibli kaayo. I am so interested to know why it happened sa Verde Soko. Board Member Sabal tan-awa palihog!” mando sa gobernador ug nipasabot nga si Sabal ang labing unang opisyal nga nag-imbestigar ug nagreport dihang migawas nga adunay nanulod nga basura sa probinsya.
Gibutyag sab ni Emano nga ang maong basura nisulod sa pantalan sa lungsod sa Villanueva ug gidala sa Sta. Cruz sa Tagoloan.
Sa iyang bahin nadismaya sab og maayo si Mindanao International Container Terminal o MICT port collector John Simon sa kinsa man ang responsable sa pagkasunog niini.
Gitouhan sab niini nga adunay mga opisyal sulod niini nga naghimo sa ingon tungod kay mokabat sa P7.5 milyon ang magastos kon ibalik kini sa nasod sa South Korea.
Ngani ning bag-o lang nag-report si SP Board Member Sabal ngadto sa sesyon sa sangguniang panlalawigan pagkwestyon sa kalangan sa pagpabalik sa basura.