NAGSUGOD na pag-imbestigar ang Regional Anti Cyber-Crime Group 7 sa reklamo sa unom ka mga tawo nga biktima sa double your money scheme sa social media.
Matod ni Police Master Sergeant Henry Abatayo, anti-cyber crime investigator, nga makig-alayon sila sa usa ka money courier diin didto gipadala sa mga biktima ang kwarta alang sa pag invest sa Phoenix Trading.
Lakip sa ilang hangyuon mao ang usa ka telecommunications company nga maoy ang gigamit sa pagpadala sa ilang kwarta.
“Atoa pa sila hangyuon para makuha nato ang information sa gipadalhan nila sa kwarta, asa gikuha ang kwarta nga gipadala. Diha ta magsugod sa imbestigasyon,” matod ni Abatayo.
Si Police Brigadier General Debold Sinas nimando usab sa Criminal Investigation and Detection Group 7 (CIDG) nga moabag sa imbestigasyon. (AYB)