INSIDE job usa sa gitan-aw nga angulo sa kapulisan sa siyudad sa Sugbo sa pagtulis sa head guard sa usa ka security agency nga manweldo unta sa kauban niining gwardya sa Deca Homes Tisa alas 2:30 sa Martes sa hapon, Agusto 13, nga miresulta sa pinusilay ug pagkamatay sa usa ka AWOL nga police.
Anaa na sa kustodiya sa Labangon Police Station ang cellular phone ni kanhi Staff Sergeant Jobie Antipolo, ang police nga nag-absent without official leave nga kauban sa mitulis ni Edwin Velos ang head guard sa Sarsalejo security agency.
Matod ni Police Colonel Gemma Vinluan, hepe sa Cebu City Police Office (CCPO), nga aduna silay nakuha nga impormasyon sa cellphone niini diin aduna siyay gika text nga laing tawo.
Ilang ipasusi ang unod niini kinsa kining gika hinabi sa kanhi police nganong nasayod sila nga adunay dala nga dakong kwarta ang head guard.
“Malaking angulong inside job, yan ang inimbistigahan ng police natin, may nakuha kaming cellphone na kausap nung police na namatay so titingnan natin yung authenticity ng transaction na pweding mag lead sa sino ang nag bigay ng information na itong security guard na ito ay may dalang kalahating milyon. Imposible na itong security guard ay by chance ay na hold up,” sigon ni Vinluan.
Sigun sa mga saksi nga mihatag sa impormasyon sa kapulisan nga duha ka suspek sakay sa usa lang ka motor ug sa dihang naabot na ang ilang biktimahon nga si Velos mikanaog ni ug dayong pamusil.
Igo si Velos sa likud nga dali usab nga gidala sa tambalanan sa siyudad sa Sugbo ug anaa pa sa talandugon nga kahimtang.
Apan giingong usa ka lalake nga naghukas sa iyang senina ang kalit lang mi butho ug dayong pamusil sa duha nga nanulis nga miresulta sa kamatayon diha-diha dayon ni Antipolo samtang samaran usab ang mi ilog sa motor sa head guard.
Ang pangutana karon ni Vinluan kinsa kining lalake nga namusil tungod kay dili pa nila ma ilhan gumikan kay walay cctv camera ang dapit diin didto nahitabo ang insidente sa pagpanulis.
“Yun yung alamin natin kung sino yung bumaril,” dugang ni Vinluan.
Nag pahigayon karon sa ilang follow up operation ang CCPO nga posibling sa mosunod nga mga oras aduna na silay positibo nga resulta.
Si Antipolo giingong nag AWOL na sugod niadtong 2016 apan ang identification card nga nakuha sa mga sakop sa Scene of the Crime Operation (SOCO) niadtong tuig 2017 aktibo pa kini.
Matod ni Vinluan nga ila kining sutaon uban ang Cebu Provincial Police Office (CPPO) nganong aduna pa siyay ID sa PNP o ba kaha iya lang kining gipahimo.
Sa milabayng semana adunay insidente sa pagpanulis sa siyudad sa Mandaue diin ang biktima nagdala sa payroll money sa usa ka kompanya alang unta ipang sweldo sa mga trabahante.
Matod ni Police Colonel Jonathan Abella, hepe sa Mandaue City Police Office (MCPO), nga ila pang itandi ang mga kuha sa cctv camera sa napatay nga kanhi police sa Barangay Tisa.
Nagduda si Abella nga ang kanhi police mao ra usab ang nagtulis sa payroll sa Mandaue tungod sa pamaagi sa pagtulis.
"Amo usa I compare sa cctv kung pareho bag built ang suspect sa Cebu City ug dinhi sa Mandaue kay pareho man payroll money ang gipang tulis,” matod ni Abella. (AYB)