WA IKABALAKA ni Sean Gibbons, presidente sa MP Promotions, ang panglawas ni Manny Pacquiao human sa away niini batok sa batan-on nga si Keith Thurman niadtong Hulyo 20, didto sa Las Vegas, Nevada.
Kini tungod kay alang kaniya wala mabun-og si Pacquiao sa maong away. Hinuon iyang giangkon nga dihay nga higayon nga maigo si Manny og mga solidong kumo ni Thurman apan wa kini makatarog sa kabaskog sa fighting senator.
“I was with the senator after the fight and then the next morning, and he was shadow-boxing, he was jumping around. He could go another 12 rounds,” saysay ni Gibbons nga napatik sa abs-cbn.com. “So, maybe it appeared that he took a few heavy shots, which he did. He took maybe 3 or 4 real clean shots, but at no point did he take a beating.”
Hinuon, si Gibbons kinsa maoy nahimong guest sa Philippine Sports Association (PSA) Forum didto sa Kaulohan sa niaging adlaw, nagdumili sa pagtubag sa dihang gipangutana sa mga media kon pipila pa ka away ni Pacquiao sa dili pa kini hingpit nga moretiro.
“I don’t want to speak for the senator.” From my own personal opinion, we take one fight at a time. So whatever the next fight is, he sets it up. You’ll know,” dugang ni Gibbons.
Dako ang pagsalig ni Gibbons nga mismong si Pacquiao nakahibawo sa iyang gipamati, ug kini maoy labing nasayod kon kanus-a siya moretiro sa pamoksing.
“Senator Manny Pacquiao is the most intelligent person I’ve been around for boxing. He knows when it’s time. He’ll see it.”
Apan daw og sa wala pa kini moabot, sanglit target ni Pacquiao nga moaway na usab sa sayong bahin sunod tuig, bisan tuod og wala pa matino kon si kinsa ang iyang makontra. Lakip sa pili-an mao sila si Mikey Garcia, Danny Garcia o kaha si Shawn Porter.
Pipila ka mga boxing personalities ang mipadayag, nga sa edad nga 40 anyos ug sa kadaghan na sa iyang mga away ilabi na batok sa mga dekalidad nga mga fighters, angayan na gyud nga moretiro na si Pacquiao.
Lakip ang mipabuhagay niini mao ang iyang kanhi promoter nga si Bob Arum kinsa mipasumbingay nga mintras wala pa maapektohi ang ulo sa fighting senator kinahanglan nga mopahuway na kini sa pamoksing.
Mao usab kini ang sempatiya sa Mexicanong si Juan Manuel Marquez, kinsa mi-knockout ni Pacquiao sa ikaunom nga round sa ilang ikaupat nga panagsangka. (JBM)