GIPUKAN sa University of San Jose Recoletos (USJ-R) Jaguars ang Cebu Institute of Technology-University (CIT-U) Wildcats, 91-84, aron langkaton ang ikatulong luna sa 1st Captain Kirk Bryan Repollo/St. Agustine Cup inter-collegiate basketball tournament nga gipahigayon sa Inayawan Sports Complex, dakbayan sa Sugbo.
Ang rally sa Jaguars sa third quarter maoy nahimo nilang agianan sa kadaugan, human sa sikit nga kombati ka unang duha ka mga quarters nga mitapos sa 43-43 nga panagtabla.
Apan ang Jaguars, ubos sa panaghugpong nila ni Elmer Echavez, Renz Solomon ug Miguel Gastador, nakapahagsa og 24-14 nga rally sa third quarter aron kuliton ang 67-57 nga labaw.
Gikan niini, wala na mobuhi pa ang Jaguars sa lingkoranan sa drayber hangtod sa katapusang hut-ong sa panag-engkwentro.
Hangtod ning pagsulat, padayon pang nagkombati ang University of Cebu (UC) Webmasters ug University of Southern Philippines (USPF) Panthers alang sa championship game.
Ang Webmasters nasulod sa finals human kini miharos sa elimination, 3-0, samtang ang Panthers nakahulbot usab og puwesto sa finals pinaagi sa quotient system.
Ang torneyo nga gisugdan sa niaging semana, maoy usa sa mga kalihukan alang sa naghinangat nga kapistahan sa barangay Inayawan.
Sa juniors inter-sitio tournament, ang Porok 1 Sitio Tugas mipatapsing sa Porok 5 Sitio Plus, 73-71, aron sakmiton ang kampiyonato.
USJ-R (91) - Echavez 24, Solomon 17, Gastador 14, Roble 13, Cabulao 8, Tablo 6, Gonzaga 5, Carin 2, Mondarez 2.
CIT (84) - Aloro 30, Kong 12, Jabonite 8, Sable 8, Ventura 4, Proel 4, Vallena 2, Selma 2, Escalona 2. (JBM)