SECTIONS
Saturday, August 24, 2019
SUPERBALITA CEBU

Niñal: Ang kabaw sa Carcar

Eskina

SA TANANG nahatagan nako og seminar, katong sa Carcar sa miaging duha ka semana ang labing di nako makalimtan. Samtang kasagaran sa akong audience mga estudyante, kadtong sa Carcar mga maestro’g maestra.

Unsay matudlo nako sa mga magtutudlo?

Hunahunaa unsay imong itudlo, dili unsaon pagtudlo, ingon akong misis samtang nag-drive mi padung sa Carcar buntag sayo atong adlawa. Aduna koy hapit baynte ka tuig nga kasinatian sa topic nga akong hisgotan, ingon siya. Way makalupig ana.

Ang topic sa workshop, Feature Writing. Sakto si misis. Bisan tuod og ang akong trabaho kaniadto naka-focus sa straight news, ang akong kasingkasing anaa sa feature writing.

Unsay kalainan sa duha? Kon tinamban nga istorya, moingon ta nga ang straight news mao nang “pure balita,” samtang ang feature mao nang “ambot unsa na, basta di na siya pure balita.”

Kon sa classroom nga setting, maghisgot dayon ta og “5 Ws and 1 H” -- what, who, where, when, why ug how. Sa straight news, mao ni ang mga detalye nga kinahanglang anaa sa una o pirmerong duha ka paragraph. Unsay nahitabo? Kinsa ang nahitaboan? Asa nahitabo? Kanus-a nahitabo? Ngano? Unsang pagkahitaboa?

Sa feature writing, anaa gihapon ning mga detalyeha apan mahimo nimong katagkatagon sa sinuwat. Mahimo nga ang imong when ug why anaa sa intro, ang imong who ug what naa sa tunga, ug ang where ug how naa sa tumoy.

Kon sa straight news di nimo langay-langayon ang paghatag sa mga importanteng detalye, sa feature writing mahimo nga imong ipaigot, ipa-thrilling, duwa-duwaan ang imong pagpresentar sa imong istorya.

Kon ang straight news writing susama anang nagdali kang migawas sa balay kay ma-late na ka sa trabaho, ang feature writing susama anang nag-strolling ka sa plaza sa adlawng Domingo kuyog imong cute nga iro.

“Makahatag kag example sir?” nangutana ang mga maestra. “Depende, kon hatagan ko ninyog chicharon,” ingon ko. Ug nangatawa sila, samtang naghuot sa usa ka gamay nga classroom ug naglisod paglingkod sa mga bangko nga pambata.

“Usa ka maestro sa Carcar City gidakop sa kapolisan gahapon sa hapon human kini giingong nasakpan nga nangawat og kabaw sa silingan,” ingon ko. Mao nay straight news.

Ang feature writing pwedeng ingon ani:

“Nganong mangawat kog kabaw nga kadako sa akong sweldo?” matod pang sir. “Ug kabaw gyod? Pagka way dungog pud anang kabaw,” dugang pa niya. Ug sa luyo sa presinto madungog ang pobreng kabaw, “Ungaaaaaa!”

“Lingaw kaayo ang imong talk,” ingon si misis padung mi pauli, samtang nagkaon sa chicharon nga hinatag sa mga maestra. “Salamat,” mitubag ko.

“Lamia gyod aning chicharon sa Carcar oy,” ingon siya. “Kabaw ra ba na,” ingon ko.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph