GIBUTYAG ni Presidente Duterte atol sa anibersaryo sa Philippine National Police (PNP) nga tugotan niyang modawat na og regalo ang mga sakop sa PNP gikan sa mga tawo nga boluntaryong mohatag sama niadtong ilang natabangan. “Dili ko gustong mo-apeki ninyo. Kon adunay boluntaryong mohatag og pahalipay o regalo ninyo, puwede ninyong dawaton basta wala lang mo mo-demand,” matod ni Duterte.
“Dili man kana bribery gumikan kay wala man kamo mo-demanda ug boluntaryo man nilang gihatag isip pagpalipay. Kanang naa sa balaod sa anti-graft, binoang na, matod pa sa Presidente. Ang taga Davao City nga mga pulis nahitabalo niana kay dugay na kaayo kanang gipraktis sa Davao. Basta dili lang mangilkil sa publiko, okey ra na. Pananglitan nakatabang mo sa pagsulbad sa usa ka kaso ug hatagan mo og pahalipay, dawata ninyo,” matod pa sa Presidente.
Ubos sa Republic Act 3019 kon Anti-graft and Corrupt Practices Act, gidid-an sa pagdawat og mga regalo ang mga empleyado ug opisyal sa gobiyerno. Naa usab gihapon kining maong probisyon sa Republic Act 6713 kon Code of Conduct and Ethical Standard for Public Officials and Employees. Labi pa kon adunay conflict of interest kay mahulog kini nga bribery.
Dili ba kalapasan ning maong mga balaod ang kamanduan ni Presidente Duterte? Morag nakasupak ning maong pamahayag sa Presidente ning maong mga balaod nga gidili sa mga empliyado sa kagamhanan ang pagdawat bisan man gani sa gamay’ng regalo. Bisan man gani sa reward system, exempted man ang mga pulis kay ila man kanang trabaho ang pagsulbad sa krimen.
Kuyaw usab nga kining maong direktiba, maka-enganyo sa kapulisan nga mangurakot nalang hinoon. Unya ilang ipaagi nga boluntaryo nga mihatag ang ilang natabangan. O ba kaha magtinapulan na ang mga pulis ug dili na molihok kon walay pahalipay. Mas maayo siguro nga klarohon ni og maayo sa Presidente kay mosamot unya nga mas modaghan ang mga binoang sa atong kapulisan. (bobbygnalzaro@gmail.com)