DALAYGON nga lakang sa kagamhanan ang paglimpiyo sa han-ay sa Philippine National Police (PNP). Dili sayon ang pag-ila sa mga miyembro nga malapason sa balaud ug ang pagtaral kanila sa hukmanan.
Kini ang sakto apan komplikado lang human nakagamot na kini sa daut nga karaang sistema. Apan matumbok gyud, nganong dili ipahamtang dayon ang labing bug-at nga silot sa pagtaktak nila sa serbisyo ug pagpasaka og kaso? Nganong magpa-goryogoryo pa?
Dili pa lang dugay sa dakbayan sa Sugbo, tulo ka mga pulis ang kompirmadong positibo sa gidiling drugas. Ang ilang hepe sa Waterfront Police Station nasurprisa human giingong maayo og performance sila s Police Corporals John Combis, Kinsman Omolan ug Robert Amascual.
Si P/Brig. Gen. Debold Sinas, direktor sa Police Regional Office - Central Visayas, nimando sa tulo sa pagtangtang ug gipabalik lang sa rehiyonal nga buhatan nga ‘floating status’ o walay assignment. Pagkahayahay sa mga hinampak.
Kon estrikto kita sa mga sibilya nga nadakpan, mas doble ang kaestrikto ug bug-at ang silot sa mga tigpatuman. Hinuon, wala usab kita magsugyot nga ipaubos sila sa extra judicial killing (EJK) nga akusasyon sa PNP gikan sa human rights group.
Lab-as pa nga taho nga laing tulo ka mga pulis ubos sa Cebu Provincial Police Office (CPPO) ang nasakpan nga nangatulog ug naghubo sa ilang uniporme atol sa ilang duty. Duha ka mga pulis sa dakbayan sa Danao ug usa gikan sa lungsod sa Catmon. Pastilan, katulgan lang ang kadako na sa ilang suweldo.
Responsibilidad sa kapulisan nga kanunay alerto sa duty.
Ug sama sa gisaysay sa taas, ang paglimpyo sa PNP dili ingon kasayon sa pagsulti, apan kinahanglan nga dili usab double standard sa ilang hingpit nga pagpatuman sa ngipon sa balaud kon itande sa pagsilot batok sa mga way nahut o kabus nga sibilyan.