ORMOC City, Leyte -- Kapin sa 100 kilometros nga fault line sa Leyte wa pa molihok, matod sa taga Philippine Institute of Volcanology and Siesmology (Phivolcs).
Kini gisulti ni Jeffrey Perez, Phivolcs supervising science research specialist atol sa press conference sa Ormoc City Hall.
Matod ni Perez nga 140 kilometros ang kinatibuk-ang sukod sa fault line sa Leyte area nga gitawag nila og ‘Leyte Segment’.
Sa 140 kilometros nga fault line, 26 kilometros niini ang nilihok na niadtong Hulyo 6, 2019 diin nimugna og magnitude 6.5 nga linog sa Ormoc City.
Ang Leyte Segment nitadlas gikan sa lungsod sa Leyte, Leyte paingon sa Mahaplag, Leyte.
Miprangka ang Phivolcs nga kon molihok ang maong nahabilin nga kilometros sa fault line, makamugna kini og intensity 8 nga linog.
Ang Leyte Fault parte kini sa 1,200 kilometros nga Philippine Fault gikan sa Northwestern Luzon paingon sa Southeastern Mindanao.
Niini, ang Phivolcs nanawagan sa tanan lokal nga kagamhanan ug mga residente nga dapat andam kanunay sa posibling linog nga moigo gumikan kay di matag-an o mahibaw-an itandi sa bagyo.
Si Ormoc City Mayor Richard Gomez ug mga opisyal nangita og mga yuta nga mamahimong balhinan sa mga residente nga nanimuyo sa mga delikadong lugar.
Gisugilon sa mayor nga prayoridad karon ang mga pamilya nga nanimuyo sa Barangay Gaas, Cabaonan, Dolores, Tongonan ug Lake Danao.
Ang maong mga barangay delikado kon dunay linog.
Dugang sa mayor nga ang pag relocate sa mga pamilya dunay koordinasyon sa Department of Social Welfare and Development (DSWD) ug National Housing Authority (NHA).
Subay niini, 64 ka mga pamilya ang na relocate na sa Bagong Pag-asa resettlement site sa Barangay Margen, Ormoc City.
Kini ang ikatulo nga batch sa mga pamilya nga gipangbalhin sa Lokal nga Kagamhanan sa Ormoc sa permanent housing sa National Housing Authority.