ANG Inasal Park sa plaza sa Talisay City hall ang himuon na matag Dominggo nga kalihukan.
Nakita sa kagamhanan nga makatabang kini pagpalig-on sa bonding sa pamilya, pinaagi sa pagtagana og panahon. Diin mamahimo usab nga koyug ang mga pet sa pamilya sama sa mga iro.
Sa plaza sa City hall, mamahimo nga maka-picnic, samtang malingaw ug mabusog sa mga crispy ug juicy nga lechon.
“Ang gusto lang gyud nato is to create a family vibe dire sa City hall, nga every Sunday pwede mo moari, human mokaon mo og lechon sa plaza sa City hall, kay nindot sad kaayo og vicinity,” matod ni Mayor Gerald Anthony Gullas.
Gitug-an ni Gullas nga nakita nila uban ang tourism department nga nagmalampuson ang unang inasal park niadtong Domingo, Agusto 11.
Diin niabot sa dul-an 300 ka mga tawo ang nalingaw ug nabusog, sa tunga lang sa adlaw nga inasal park.
Duha ka mga lechoneros lang gihapon ang gihatagan og higayon nga makabaligya diha sa plaza sa City hall.
Karong Septiyembre 1 pa ang grand opening, gihimo kini nga kada Dominggo sa tibuok bulan sa Agosto, aron maanad na ang Talisaynon ug uban nga mga turista.
“Soft opening lang sa gyud ni tanan. Tan-awon sa nato kon unsa ka daghang mga tawo karong Sunday ug sa mosunod. Kay pag-last Sunday, Ironman man to, so daghan ang naa. So tan-awon nato kon mag-grand opening ba sa September 1,” matod ni Gullas. (AVN)