DUNAY barangay sa dakbayan sa Lapu-Lapu nga gipaninguha nga ma-drug-free karong Septiyembre 2019.
Kini human gilihok na sa City of Lapu-Lapu Offiice for Substance Abuse and Prevention (Closap) ang mga kinahanglang rekisitos sa pagdeklarar sa Barangay Caohagan sa isla sa Olango nga drug-free sa oversight committee nga gipangulohan sa Philippine Drug Enforcement Agency (PDEA) 7.
Ang Caohagan usa ka island barangay nga maabot lang sakay sa motorbanca gikan sa mainland.
Aduna kini populasyon nga moabot sa dul-an 700 ka mga tawo.
Kagahapon, ang City Anti-Drug Abuse Council (Cadac) nga gipangulohan ni Lapu-Lapu City Mayor Junard Chan mibisita sa isla aron pag-revitalize sa anti-drug abuse council sa barangay isip usa sa rekisitos sa drug-free sa dapit.
Gipasabot sa pangulo sa Closap, si Garry Lao, nga karon nga na-revitalize na ang anti-drug abuse council sa barangay hayan ang certification na lang nga walay drug pusher o user sa dapit ang ilang gihuwat aron maduso nila ang pagka drug-free sa Caohagan sa oversight committee.
Dugang ni Lao, ang Caohagan mao ang ilang nahunahunaang ipa-drug-free, gawas nga gamay ra ang populasyon sa nahisgotang dapit ganahan usab ang mga opisyales sa barangay nga gipangulohan ni Kapitan Ranilo Abayan.
Wala usay drug surrenderer ang nahisgotang dapit.
Usa sa rekisitos sa pagdeklarar nga drug-free sa usa ka barangay kinahanglan nga walay presensya sa mga drug user ug pusher.
Gipasabot ni Lao nga dako unyang hagit sa mga opisyal sa barangay ang pagmintinar sa ilang drug-free status.
Si Mayor Chan nihangop sa posibilidad nga naaa nay drug-free barangay ang dakbayan sa umaabot.
“Tungod sa disiplina sa matag usa ug hugot nga pag monitor mga opisyal,” matod ni Chan.
Lakip sa miuban sa Cadac sa pagbisita sa isla mao ang pangulo sa Police Community Relations sa Lapu-Lapu City Police Office (LCPO) nga si Police Colonel Noli Cernio, Jonah Pino sa Department of Interior and Local Government (DILG) ug mga representante sa Philippine Drug Enforcement Agency (PDEA) 7. (GCM)