HUMAN sa dili paborableng opinyon sa Department of Interioir and Local Governent (DILG), nagpadayon ra sa iyang gimbuhaton si Lapu-Lapu City Administrator Atty. Danilo Almendras samtang nagpaabot sa approval sa iyang appointment nga luwatan gikan sa Civil Service Commission (CSC) 7 Field Office.
Samtang masaligon si ng OIC City Attorney James Sayson nga kaaprobahan ra sa CSC ang confirmation ni Almendras nga ila nang gipadala niadtong unang semana sa Agosto.
Sa dihang mibabag ang konseho sa dakbayan atol sa miaging council session niadtong Agosto 8, sa appointment ni Almendras gumikan kay dili kini residente sa Lapu-Lapu
“I’m quiet confident nga ma-approved to. Klaro man sa Local Government Code ug sa Civil Service,” tipik sa pamahayag ni Sayson sa Superbalita Cebu.
Ang pagbabag sa mga sakop sa Sangguniang Panglungsod way bili human nga napupos na ang a 15 ka adlaw nga tagal gikan sa pagkatudlo ni Almendras sa maong posisyon.
Natala sa Local Government Code, Section 454 diin ang konseho, “shall act on the appointment within 15 days from its submission, otherwise the same shall be deemed confirmed.”
Samtang, ubos sa CSC 2017 Omnibus Rules on Appointments natala nga “Appointment to head of department or office, such as Department Head, Administrator, Legal Officer and Information Officer positions not acted upon by the Sanggunian within 15 days from the date of its submission.
“Certification issued by the Sanggunian Secretary or HRMO confirming the non-action by the Sanggunan.”
Nasayran nga niadtong Hulyo 30 ang konseho miluwat og certification “no action” sa endorsement ni Mayor Junard Chan alang sa posisyon ni Almendras.
Giklaro ni Sayson nga nakapamatuod sab si Almendras nga aduna siyay balay sa dakbayan gawas sa iyang balay sa Mandaue City, pinaagi sa iyang certification pinirmahan sa opisyal sa homeowner sa usa ka subdivision sa Barangay Basak, Lapu-Lapu.
Dugang pa ni Sayson kasamtangan nga si Almendras ray gikuwestiyon sa pagkatudlo isip department head sanglit ang uban nga opisyal nga dili lumad nga taga-dakbayan ug wa maghupot og posisyon isip deparment head.
Iya sab nga gitataw nga ang iyang posisyon sa City Attorney’s Office usa lang ka officer-in-charge (OIC) .
Laing buhatan nga gihuptan niadtong dili residente sa Lapu-Lapu sama sa City of Lapu-Lapu Office of Substance Abused Prevention nga gipangulohan ni Gary Lao, dili usa ka departamento gani pending approval sa konseho ang maong buhatan.
Ingon sa Press Information Office nga gipangulohan ni Oscar Pineda usa lang ka division ubos sa Mayor’s Office lakip na ni Nagiel Bañacia kinsa OIC sa City Disaster Risk Reduction Management Office ug uban pang opisyal nga gikuwestiyon ang posisyon.
“Ako lang i-clariy ang misconception sa uban nga ang kining position di kinahanglan og residency but ang trust and confidence sa mayor,” panapos ni Sayson.
Sa laing bahin, nag ung-ong pa sa field office sa Civil Service Commission (CSC)7 ang confirmation ni Almendras.
Si Atty. Marvi Miranda, head sa legal division sa maong ahensiya nipasabot nga susihon sa ilang buhatan kon nasubay sa husto nga proseso ingon man sa mga gipangayo nga requirement ang pagkatudlo sa maong opisyal. (FVQ)