CLEAN-UP drive sa kasapaan ug suba sugod sa Barangay Kalunasan padulong sa bukana sa Barangay Pasil, dakbayan sa Sugbo, diin gibahin kini og siyam ka station, ipahigayon karong Sabado, Agusto 17.
Ang mohimo sa pagpanglimpyo mao ang mga kawani sa Cebu City Hall, tinabangan na sa kapulisan sa Cebu City Police Office (CCPO) ug sa Navy.
Matud ni Atty. John Jigo Dacua ang pangulo sa Cebu City Environment and Natural Resources (Cenro) nga gibahin nila ang gatusan ka mga tawo sa City hall ngadto sa siyam ka station.
Magsugod ang clean-up drive alas 5 sa kaadlawon hangtud na sa 10 sa buntag.
Dili lang pagpalimpyo ang himuon sa taga Cenro, apan lakip na sa pagpahinumdom sa mga residente ug mga tag-iya og establisemento daplin sa mga sapa sa pagtabang sa pagpreserba sa kalimpyo sa ilang kasapaan.
Pagpahinumdom na usab kanila nga kon padayon nga magpataka og labay og basura diha sa sapa, pasakaan na sila og tukma nga kaso.
“Atong buhaton ana, while nag-clean up drive ta, naa tay mga enforcers nga mosuroy sa mga establishments or households living within the 3-meter easemen, mohatag og pahimangno sa ilang obligasyon sa mga nanimuyo diha ug sa mga establishments, nga dili magpataka og labay, otherwise, they will face appropriate action,” saysay ni Atty. Dacua sa Superbalita Cebu
Matud ni Dacua nga ila una gi-focus ang maong sapa gikan sa Kalunasan nga lahus na sa Pasil bridge, nga mao nay lahus ngadto sa dagat.
Seguruduon nga limpyo na ang maong sapa, ilabi na sa Guadalupe river una sila mohimo’g subsob nga pagpanglimpyo sa ubang sapa sa syudad, subay sa mando ni Mayor Edgardo Labella.
Giandam na ang mga gamiton nga gloves, sako ug ang mga trak nga kargahan unya sa mga basura nga mahipos.
Dugang ni Dacua, nihimo na usab sila og pagsusi sa mga establisemento ug kabalayan kansang hugaw gidiretso sa suba o sapa. (FMD)