SUBAY sa mga aksidente diin nalambigit ang mga motorbanca, di na kini mamahimong makabiyahe ang mga bangka sa gabii.
Sa giluwatan sa Maritime Industry Authority (Marina) 7 nga advisory no. 08-04-2019 sa Miyerkules, Agusto 14, aduna’y bag-ong guidelines ang gipagawas sa maong ahensiya alang sa operasyon sa tanang pampasaheroan nga bangka.
Lakip sa mando ni Engr. Marc Anthony Pascua, regional director sa Marina 7, kinahanglan magsul-ob og life jacket ang pasahero sa tibuok biyahe.
Anaa ra usab sa 75% sa kapasidad sa bangka ang mamahimong mabiyahe sa motorbancas.
“The assistance of the Philippine Coast Guard is hereby sought for the full and effective implementation of the aforementioned guidelines,” tipik sa maong mando.
Samtang hinay-hinay na unya nga ipatuman sa Maritime Industry Authority (Marina) 7 ang pag-phase out sa wooden-hulled ships o motorbancas sa Dakbayan sa Lapu-Lapu aron masiguro ang kaluwasan sa sumasakay niini.
Matod ni Atty. Daniel Martin Oral, legal officer sa Marina 7, karon tuiga unta ang uwahing tuig sa pagpatuman sa Mirina Circular 2016-02 o ang “Revised Rules on the Phase Out of Wooden-hulled Ships Carrying Passengers in Domestic Shipping,” apan posible nga di pa kini hingpit nga mapatuman.
Usa sa himuon sa Marina 7 mao ang pakig-coordinate sa Lapu Lapu City government aron mapatuman na kini subay sa aksidente sa kadagatan sa Lapu-Lapu.
Usa ka bangkang pasaheroan nibiyahe atol sa gale warning niadtong nakalabay nga semana nga gikan sa isla sa Olango.
Dugang ni Oral nga ang biyahe sa lungsod sa Santander paingon sa Sibulan wa nay nagbiyahean nga wooden-hulled ship.
Ang nagpabilin mao ang fast craft ug katong sakayan nga ginama sa fiber glass.
Bisan pa og barato ang plete sa mga sakayan kon itandi sa mga modernong steel-hulled ship, matod ni Oral di kini dapat himuong sukaranan aron di ipatuman ang maong phase out.
“We will intensify ang amoang program to adopt [a] culture [of] safety. Our safety is not cheap,” matod ni Oral.
Aduna’y gitumbok nga tulo ka operator sa Sta. Rosa sa isla sa Olango ang kasamtangang nagpadayon pagbiyahe og pasakay og mga pasahero. Kini aduna’y lima ka mga sakayan. Samtang, lain usab nga lima ang gitumbok nga nabiyahean ug nanukad sa Angasil Port. (HBL)