NAGKINAHANGLAN og P500 milyones ang Cebu City Government para pag-ilis ug pagbag-o sa traffic lights system sa Dakbayan sa Sugbo.
Si retired Police Major Andres Bayarcal, operations chief sa Cebu City Transportation Office (CCTO), nagkanayon nga niduso sila og budget para maapil sa annual budget sunod tuig ang pag-ilis sa tulo ka mga dekada nga Sydney Coordinated Adaptive Traffic System (Scats).
Si Mayor Edgardo Labella nibutyag nga ang maong kantidad maoy kanhi buot igahin sa administrasyon ni kanhi Mayor Tomas Osmeña para sa proyekto apan wa mahinayon.
Ang mayor pabor nga mailisan na og bag-o ug moderno nga Scats nga digital ang karaan nga traffic light system sa siyudad.
Pangitaan kini og pundo para sa katumanan sa proyekto.
Si Labella nagkanayon nga ang pag-ilis og modernong traffic lights usa lang sa daghang mga lakang nga buhaton sa Siyudad, sama sa epektibo nga pagdumala sa mga traffic intersection nga ilang gibantayan.
Dugang ni Labella nga labing dako og matampo sa pagpaluag sa dagan sa sakyanan mao ang integrated inter-modal transport system (IITS).
Ang construction niini sugdan sa di pa matapos ang 2019.
Kini pagalangkuban sa, Monorail Transit, Bus Rapid Transit ug cable car system nga gipanglantawan nga mosugod og operate sa di pa mosulod ang 2022 base sa direktiba ni Department of Transportation (DOTr) Secretary Arthur Tugade.
Kon maaprobahan sa City Council ang P500 milyones nga pundo sa CCTO karong Oktubre o Nobyembre, posible nga sayo sunod tuig makasugod na sila og pangita og service provider.
‘Overpriced canal’
Si Regional Director Vic Caindec sa Land Transportation Office (LTO) 7 nagkanayon nga nagkinahanglan og igo nga panahon ang pag-ilis og bag-ong traffic system hilabi na sa 80 ka intersections sa Cebu City.
Apan iyang gipadayag nga labing maayo nga gipadaplin unta ang katukoran sa Mambaling underpass nga gigastohan og dul-an P650 milyones.
Ang gahin maayo unta gidapat alang sa pag-moderno sa karaang Scats sa Cebu City.
“Cebuanos don’t deserve this traffic anymore. We don’t need that monstrosity of an overpriced canal in Mambaling,” padayag ni Caindec.