GIKATAKDANG mopakita og aksiyon si Prince Albert Pagara uban sa iyang stablemate sa ALA Boxing Gym nga si Jeo Santisima batok sa tagsatagsa ka mga kaatbang sa ika-46 nga edition sa Pinoy Pride boxing series karong Sabado, Agusto 17, sa Ormoc City Superdome.
Ikasangka ni Pagara ang giilang knockout specialist sa Thailand nga si Ratchanon Sawangsoda sa main event samtang si Santisima mosuway sa katakos ni Alvius Maufani sa Indonesia.
Si Pagara mao ang World Boxing Organization (WBO) inter-continental super bantamweight champion kinsa adunay 31-1, 22 knockouts nga record.
Ang bugtong kapildihan nga iyang naangkon niadtong Hulyo 9, 2016 human siya ma-knockout ni Cesar Juarez sa ikawalong round.
Apan gikan niadto, impresibong gipangpildi sa lumad nga taga Maasin City ang lima niya ka mga kontra.
Gumikan niini, ang 25 anyos nga Pagara mipasaka na sa iyang ranking sa WBO diin siya ang no.3 contender ni Emmanuel Navarrete sa Mexico nga maoy naghupot sa bakus.
Upat ka mga Pinoy ang nasulod sa top ten sa WBO rankings. Si Marlon Tapales mao naghupot sa unang puwesto ug Juan Miguel Elorde sa ikaduha. Santisima anaa usab sa ikapitong lingkuranan.
Ang 28-anyos nga Sawangsoda, sa iyang bahin, nahimong WBC Asian Boxing Council Silver super flyweight champion.
Siya naghupot og 12-3 nga baraha diin ang tanan niyang gipangpildi pulos iyang gipang-knockout.