“Ang pag-ukopa sa mga pulo o isla sa South China Sea o West Philippine Sea usa lang sa mga estratihiya sa China aron sa pagpasayon sa ilang misyon.”
GIPAKITA sa nasud China ang ilang handum nga mabalik ang pag-ila kanila nga usa ka gamhanan nga nasud human sa daghang katuigan nga nagpakahilom.
Naila ang mga Intsek sa natad sa ekonomiya sumala sa kasaysayan diin ang ilang mga katigulangan motabok og kadagatan alang sa ilang patigayon gikan sa kinagamayan nga butang hangtud sa mga moderno nga mga mugna sa moderno nga panahon karon.
Nagbaha ang mga produkto sa mga tindahan nga gama sa China nga kaniadto daw dili mahalin apan karon halos tanan made in China ang tatak nga atong makit-an.
Mikuyanap ang ilang produkto bisan pa ngadto sa United States ug karon naa sa ikatulo nga dapit ang ilang ekonomiya sa tibook kalibutan.
Si kanhi President Jiang Zemin sa China nanaad nga iyang balikon sa paghiusa ang China aron mahimong gamhanan pag usab. Ang Macao ug Hongkong nahimong inila sa 20th Century ug daw nanganawkanaw sa pasulong sa 21st Century sa kalibutan.
Ang nasud China sa hilom nagatukod sa iyang modernong makinarya ig gugubat. Ilang ginapalambo ang ilang teknolohiya inay nga kopyahon ang hinimo nga mga armas sa America uban sa tinguha nga palabwan pa ug himoon nga mas accurate ang pag igo sa target.
Sa atong pagpanuki-duki akong nasayran nga duna silay long range precise strike weapon ug mahino na nila ang pag jam ug pagsulod sa computer sa uban, wad-on ang communication o ang traffic control ug pag drain o kuhaon ang kwarta sa uban sa ilang mga bank accounts.
Ang Peoples Liberation Army nagpalambo ug nagbaton sa world’s largest information warfare program ikaduha sa United States of America tungod sa ilang handom nga papason ang ilang mga kaatbang nga wala nag gubat nga mahitabo dili sama sa naadan.
Gitan aw sa China nga ang nasud sa America nagapabilin nga babag sa ilang handom nga mahimong pinaka gamhanan nga nasud sa rehiyon sa Europe ug Asia ug sa tibook kalibutan apan nagatan-aw sa America nga usa ka superpower nga inihap nalang ang mga adlaw sa iyang gahom.
Ang pag-ukopa sa mga pulo o isla sa South China Sea o West Philippine Sea usa lang sa mga estratihiya sa China aron sa pagpasayon sa ilang misyon.
Sa daghang higayon napakyas ang China apan human sa mga katuigan nga sila nagpakahilom ilang gipangandaman ang usa ka gubat nga basin mahimong katumanan sa katapusan sa kalibutan nga atong gipuy-an.
Atangi kay atong ipadayon ang paghisgot sa mga butang sa umaabot sunod nga semana.