NIANI og maayong resulta ang gilusad nga dinungan nga entrapment operations o Oplan Paglalansag Omega ug Oplan Salikop sa hiniusang puwersa sa Criminal Investigation Detection Group (CIDG) Regional Field Unit 11 ug mga personahe sa Davao City Field Unit, uban sa Buhangin Police Station alas 11 sa buntag Miyerkules, Agosto 14.

Kini human nga nalit-ag ang upat ka mga miyembro sa Butanlog Criminal Group human gironda ang Rock Gas Station sa Barangay Indangan, Buhangin District ug sa Bamboo State Subdivision sa Barangay Sto. Nino, Tugbok District sa dakbayan sa Davao.

Nasakote sa Barangay Indangan area si Sario Tamay Butanlog, kinsa giingong lider sa grupo; Anthony Anib Corpus; ug si Alfie Tadiaman Doctor samtang si Victor Sales Panerio nalit-ag sab sa Barangay Sto. Nino area nga gihulagway nga mga security guards sa gasoline station ug Bamboo State Subdivision.

Nasakmit sa mga awtoridad gikan sa posisyon ni Butanlog, Corpus ug Doctor mao ang usa ka .9mm caliber pistol nga dunay serial number 161033; usa ka magazine gikan sa 9mm pistol nga dunay kargada nga lima ka buhing bala; usa ka .38 caliber revolver nga way serial number dunay lima ka mga buhing bala; ug P1,000 nga marked money.

Samtang ang nakuha gikan kang Panerio mao ang usa ka .38 caliber revolver nga way serial number, dunay upat ka mga buhing bala ug P500 marked money.

Nasayran nga ang mga dinakpan gitumbok nga mga miyembro sa Butanlog Criminal Group nga bag-o lang nasubay nga nalambigit sa “gun running” ug tigpamaligya og ilegal nga druga sa siyudad sa Davao ug mga kasikbit nga mga probinsiya.

Davao City Field Unit nitubag sa mando sa pagwagtang sa mga loose firearms sa dakbayan ug sa mga silingang mga probinsiya.

Gikanayon sa mga awtoridad nga ang maong operasyon nisanta sa paghitak sa mga loose firearms tungod sa mga impormasyon ug tabang gikan sa nabakabana nga mga molupyo.

Nanawagan ug gidasig sa mga awtoridad ang pampubliko nga padayon nga itaho ngadto sa CIDG ang bisan unsang pagdagsang sa mga ilegal nga kalihukan dinhi sa Davao Region.