TULO ka engkwentro, kagutom ug kawalay katumanan sa mga saad ang nag-unang rason sa pagtahan sa amahan ug anak nga misurender ning bag-o lang sa Police Regional Office-Northern Mindanao sa Barangay Besigan, dakbayan sa Cagayan de Oro.
Gipresenta sa kapulisan ngadto sa mga sakop sa prensa ang mga mitahan nga gituohang sakop sa walhong grupo adlaw’ng Miyerkules, Agosto 14.
Gibutyag ni Police Lieutenant Colonel Mardy Hortillosa, tigpamaba sa PRO-Northern Mindanao, nga ang amahan namahayag nga nailad sila sa mga pasalig atol sa recruitment.
Nahimo silang Militia ng Bayan kon asa gigamit kini sila sa pagsugo-sugo tugbong ug tungas sa bukid kon dunay engkwentro apilon sa giyera.
Ang anak niini mao sab gisaligan sa kwarta ug ang gitikad nga yuta giangkon.
Matud ni Hortillosa nga gikapoy kini sila sa mga pasalig sa walhong grupo nga benipisyo kunohay alang kanila apan wala nila madawati.
Tuig 2018, nagsibat kining mag amahan ug nagpabugnaw usa dayon naghukom nga mobalik sa sabakan sa gobyerno.
Sa ilang pagtahan, kinahanglan nga ipasilitar kini sa programa sa gobyerno nga E-Clip aron ang mga basic services ilang madawat.
Kahinumduman niadtong Augusto 11, mga alas 10 sa gabii ang City Mobile Force Company sa pagpangulo ni Police Major Alexy Sonido naghimo sa negosasyon nga miresulta sa pagpanurender sa amahan ug anak nga gituohang sakop sa Guerilla Front 12 CNT.
Gipanalipdan usa ang ilang identipikasyon karon panahona.
Kuyog sa ilang pagpanurender mal ang usa ka 30 Caliber Garand Rifle (semi-automatic) nga dunay bala ug laing usa ka kalibre .45 M1911A1 Automatic Colt Pistol lakip bala.