TULO ka mga suspek sa pagtulis ug pagpusil sa usa ka head guard niadtong Martes sa hapon, Agusto 13, sa dan Sapphire sa Barangay Tisa, Dakbayan sa Sugbo, nadakpan sa kapulisan.
Apan ang tulo nag-iyahay na og tudlo kinsay nanulis ug nanghimakak sa ilang kalambigitan sa krimen.
Nasikop tuod ang tulo, blangko gihapon ang kapulisan kinsay nipusil patay kang kanhi PO2 Jobie Antipolo.
Tipik sa kwarta nabawi sa kapulisan gikan kang Pepe Arilla Acosta, 48, kinsa nitahan sa kapulisan Miyerkules sa gabii dala ang P191,000 nga kwarta.
Unang nadakpan sa Labangon Police ang giingong iyang mga kauban nga sila si Mark Ungria Vergara, 28, security guard sa Sarsalejo Security Agency, taga Casili, lungsod sa Consolacion; ug Rico Tomarong Acosta, 38, taga San Vicente, lungsod sa Liloan
Sila si Vergara ug Acosta nasikop sa Miyerkules sa kaadlawon, Agusto 14, human sila giila sa mga saksi ug security agency nga may kalambigitan sa tulis.
Pagka alas 7 sa gabii sa samang adllaw, nitahan si Acosta ug iyang gihatag sa mga pulis ang kwarta nga mobalor og P191,900 nga ilang tinulisan kang Edwin Velos.
Matod ni Police Major Henrix Bancoleta, hepe sa Labangon Police Station, nga unang nailhan si Vergara sanglit nagduda nang daan ang security agency nganong naa siya sa ilang opisina sa wa pa mahitabo ang pagpanulis.
“Siya ang una kay ka duda-duda nganong naa siya didto sa office nila kay dili man siya dapat didto, mao to gidudahan siya sa management unya kanang naa pud tay witness nga naa siya sa area pud,” matod ni Bancoleta.
Sa imbestigasyon sa kapulisan, si Pepe ang angkas ni Antipolo dihang ilang gitulis si Velos.
Siya usab ang niilog sa motorsiklo ni Velos dala ang giingong P300,000 nga pangsweldo unta sa ubang mga gwardya.
Nahabilin ang lisensya ni Pepe sa U-box sa motorsiklo nga gimaneho ni Antipolo.
Sa dihang gipakita kini kang Velos, positibo niyang giila si Pepe ug sa mga saksi sa dapit diin nahitabo ang pagpanulis.
“Amo gipakita ang picture. Ana siya (Velos) nga mao na siya, Sir. Mao nay nagkuha sa akong motor,” kutlo ni Bancoleta sa sulti ni Velos kaniya.
Mihimakak
Apan hugot nga nanghimakak si Acosta kay matod niya naa ra siya sa usa ka gasoline station sa V. Rama,Barangay Calamba, Siyudad sa Sugbo atol sa hitabo.
Iyang giangkon nga nagkita sila ni Antipolo tungod kay giingong moabang kini sa iyang motorsiklo kay adunay kuhaon nga manok igtatari uban si Vergara.
Pipila ka oras ang nilabay, matod ni Velos, si Vergara na lang ang nibalik kaniya. Gipasa niya ang bag nga adunay sulod nga kwarta ug wa siya masayod nga nanulis na diay kini.
“Wala man gud ko kahibawo nga manulis na sila nga ang akoa lang ato nga ila kong gipanaog sa gasoline station diha sa Calamba. Miingon na siya (Antipolo) nga paghuwat diha, Gaw, kay naa koy kuhaong manok. Nya pagbalik, niagi si Mark sakay atong motor. Naa siyay gihatag nga bag. Pagtan-aw nako kwarta man mao to nangita kog paagi nga mauli nako ang kwarta,” matod ni Acosta.
Nipauli siya sa ilang balay sakay sa usa ka habal-habal.
Matod niya naglibog siya unsaon niya pag-uli ang kwarta.
Apan nakuhaan na niya kinig P15,000 ngadto na sa P20,000 kay nabayad sa mga motorsiklo nga iyang gipangpakyaw ug gipamalit usab og pagkaon.
Si Vergara hugot usab sa iyang panghimakak kay naa ra siya sa tunghaan atol sa oras sa tulis. Iyang gihimakak ang pasangil ni Acosta.
Giangkon niya nga didto siya sa agency aron magkuha sa iyang sweldo.
Nidiretso siya sa eskwelahan ug giingong makapamatuod niini ang iyang mga magtutudlo ug ticket sa iyang parking.
Mo-graduate na unta siya sunod tuig sa kursong Criminology.
“Dili na tinuod, Sir, kay diha ko sa eskwelahan anang mga hitaboa. Naglibog ko nganong akoy ilang iduot aning sitwasyona, Sir,” matod ni Vergara.
Managkaila sila ni Antipolo tungod kay silingan sila sa Barili ug kanunay usab nga mo text kaniya. Mao usab si Mark, pag-umangkon ni Pepe, nga matod niya igo ra siya nga nibawos sa text ni Antipolo.
Giangkon niya nga classmate sila ni Antipolo sa Criminology sa usa ka dakong unibersidad, apan wa siya mag pulis tungod kay wala siya mo-take sa board exam sa National Police Commission (Napolcom).
Kinsay gunman lagi?
Ang padayon nalang nga giila karon sa kapulisan kon kinsa ang nipusil patay kang Antipolo nga maoy gisubay na usab sa Labangon Police Station.
Ang gunman giingong naghukas og senina, apan gawas niini, wa na silay nakuha nga laing impormasyon.