SUPERBALITA CEBU

Sugilanon: Liso sa talisay

MORAG adunay kaya ning imong mga klasmeyt sa high school, Pa, no?’ maoy pangutana ug pangagpas ni Marelyn, akong asawa, nga wala gani moyahat kanako. Lingaw kaayo siya sa pag-swipe sa screen sa akong selpon. Wala man gud nako mabatasan nga dalhon kini ngadto sa akong trabahoan. Makahasol kini sa akong trabaho. Misumpay pagsulti si Marelyn,”Nia, o, nagtampo-tampo sila para ihinabang sa klasmeyt ninyo nga ang usa nagmasakiton ug ang lain, medyo apiki.”

“Dili tingali ingon nga dato, apan successful sa ilang tagsa ka career ang kadaghanan,” dayon nakong tupad kaniya ug miapil pagsud-ong sa screen sa selpon.Nakita kong ang mga mensahe diay sa among group chat nga batch 90 ang iyang gikalingawag basa.Dugay na akong wala makagamit sa akong selpon tungod sa ka-busy sa trabaho.Unya nabasahan ko ang mga mensahe sa mga klasmeyt nakong aktibo kaayo sa social media.Diha ang mga message nilang Teresito, Jun Etcoban,

Marlon Sabino, Amando, Glenna, Phoebe, Fe, Alicia, Cathy, Juanito, Lou, Fernando, Helen ug Naty. Nasayran nako nga wala tinuod magmakuli alang matag usa sa pagpaambit sa ilang mga grasya ngadto sa among mga klasmeyt nga nanginahanglan. Unya adunay ingon sa limbo sa panahon nga miganoy sa akong handurawan balik ngadto sa among high school days.

Atbang sa among eskuylahan nagabarog ang century-age nga kahoyng talisay diha sa natad nilang Ma’m Dingal, ang maestra sa elementarya dinhi sa Barangay Bato..Namungingi kini sa kadaghan sa bunga.Human sa paniudto namahuway kami sa landong sa maong kahoy.Tingali nahinumdoman ang kalami sa gagmitoy nga unod sa bunga niini, gidagpas ni Danilo pinaagi sa sanga sa bayabas. Dihang nangahulog ang daw diamond nga porma sa mga bunga, nag-ilugay kamig pamunit.Hangtod si Ronel miapil na pagdagpas ug mao na lay among namatikdan hapit na mapuno ang sako nga giandam ni Avita, nga ambot diin niya kadto mapuniti. Mipasalig kanamo si Antonio nga siya ray bahala sa paghulam og sundang aron magamit sa pagbuak sa mga bunga.Taudtaod pa ug nagpuli-puli na sa pagtakdang silang Ariel ug Roseller.Hapit gyud mapuno sa mga unod sa bunga sa talisay ang yahong nga giandam ni Merilyn.Wala lang namo igsapayan ang kahago ug kalisod aron matigom ang unod sa liso sa maong bunga.Pagkahuman nagkuyog ming duha ka seksyon sa among batch aron adto namo kan-on sa white house,ang balay nga gipanag-iya kuno kadto sa usa ka adunahan nga tal sa Barangay Bato apan tua na manimuyo sa syudad.Ug tingali dili pod dalo ang tag-iya mao tingaling wala lamang igsapayan nga himuong pasalipdanan ang kalandong sa nagbuntaog nga balay sa mga mangaligo sa dagat o sa gustong mohanggap og lab-as nga hangin gikan sa dagat. Makayano ra mag sulod bisan kinsa tungod kay wala ra man kini korala..Dinhi sagad magpalabay kami sa vacant period.

Alegre kaayo kami samtang nangaon kay kaming tanan nakauyon man sa kalami niini nga susamag kalamion sa mani.Napalingi kami dihang miabot si Aquiles, ang among klasmeyt nga nataligam-an diay namog pakuyog.

“Hala,lain kaayo mo!”niya pa nga daw nangumedya lang o nangluod ba.”Wa gyud mo mangagda nako. Kamo ra gyud diay motilaw sa kalami anang liso sa talisay!’

Pagkadungog namo isig tampo-ampo mi sa nahibiling liso nga diha sa among mga kamot aron ipaambit kang Aquiles.

“Kaniadto gani, Love, kaya man gani namong saw-an ug bahin-bahinon ang mga liso sa talisay, nga kagamay niana!” matod ko ngadto sa akong kapikas. ”Karon pa kaha nga medyo na-grasyahan nag ubay-ubay kana sila!”

‘Belib sab bitaw ko sa imong mga klasmeyt, kay wa gyud mo magkalimtanay ug magbinatiay gyud bisan sa kadugay na sa panahon,” ni Marelyn dayong dip-ig ngari kanako.’Ug bisan ang uban layo na kaayog naabtan apan down-to-earth lang gihapon.”

Sa akong pagpadayon pagbasa sa ilang mga mensahe nasayran ko nga nagtampo-tampo na sab ang among batch aron ihinabang sa usa sa among mga klasmeyt nga adunay sakit.

“Basin maluoy ang Ginuo ug maunod-unoran na ning pitaka ko makaapil na kog tampo puhon,” hagawhaw ko sa kaugalingon. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph