MAAYO kining gihimo ni Gobernador Gwen Garcia nga paghatag og P100 ka libu ngadto sa tanang 1,109 ka mga barangay sa lalawigan sa Sugbo aron buhi-on ang namatay na natong kultora. Special mention sa gobernador mao ang bayle kun sayawan sud sa kinural ug kawayan nga adurnohan og saging nga namunga ug buwak sa kadena de amor. Kining bayle anaa usay ibaligya nga babaye nga tawgon og buwak nga sayawan sa mobayad. Ang mga sayaw niini mao ang boogie, tango, cha-cha, ug sweet.
Apan mas maayo nga buhi-on usab ang mga duwa sa entblado nga Linambay nga mogamit og kampilan, Balitaw nga magtubag-tubag ang duha ka mag-aawit ug ang Duplo ug Kulilisi nga kadaghanan nga mabati panahon nga anaay bilar sa haya-on nga minatay.
Kinahanglan usab nga ibalik ang mga duwa sa kabataan kaniadto nga tubig-tubig, bato-lata, satong, tago-tago, bagul, biko-biko, takyan ug uban pa nga dili lamang makalingaw apan exercise usab. Naa usab ang sungka nga makaba-id sa utok sa kabataan. Kon ato na kining matudlo sa atong mga batan-on, madasig sila nga moduwa niini. Kini ang makapaminus na unya sa ilang pagyangpungad sa nagkalainlaing gadgets sama sa cellphone ug tablet. Daku kaayo og gimbuhaton ang mga magtutudlo sa mga tunghaan sa pagbuhi sa namatay na natong kulturanhong kalihukan nga maoy namat-an og kahayag sa atong katigulangan. Misugyot usab si novelist Michael Rhys Po nga i-apil sa pag-promote ang gitara sa Sugbo.
•••
Uyon ako sa nahunahunaan ni Mayor Edgardo Labella nga pag-upgrade sa traffic lights sa Cebu City. Kaniadto mapagarbuhon kaayo ang siyudad nga anaa kita niining Sydney Coordinated Adaptive Traffic System (Scats). Bisan ang Metro Manila nalupigan sa atong traffic system. Nata-ud kini sa panahun ni Mayor Tomas Osmena nga gipanguluhan niadto ni Sammy Darza, 30 ka tuig na ang nakalabay. Karon, karaan na kini og kinahanglan nang i-upgrade. Na-uwahi na usab kita sa atong mga silingang mga siyudad sa Mandaue og Talisay nga nagamit na og fixed-time signals.
Nakita ang panginahanglan niining pag-ilis na sa atong traffic lights human naguba kini niadtong Martes gikan sa alas-siete sa buntag og naayo sa alas-dos sa hapon. Nakamugna kinig grabeng traffic labi na sa naandan nang busy nga mga eskina. .
•••
Pista ugma sa Barangay Ilihan nga maoy bag-ong parokya ni Padre Mark Barneso. Una kining pista nga misugat kang Fr. Mark sa iyang pagda sa maong parokya. Tungod niini, ang iyang mga suod nga higala ug supporters buot usab motan-aw sa iyang parokya. (msr1144@gmail.com)