ANG akong higalang contractor nga nagpuyo sa usa ka subdivision sa Kasambagan ning dakbayan (dili lang siya magpaila) mireklamo batok sa usa ka pulis nga naa ra usab magpuyo duol sa iyang subdivision apan atoa ma-assign sa Ayungon, Negros Oriental. Gihulga ang iyang pamilya. Kining akong higala, giunay sa iyang house helper o boy nga adik-adik. Panahon nga wala sila sa ilang panimalay, kawatan sila sa ilang boy. Naka-amigo pod og mga adik-adik ang ilang helper sa ubang mga helper sa ilang silingan nga usahay anha magsuyop sulod sa ilang panimalay.
Nabawian gyud ang maong helper sa mga butang nga iyang gipangawat gikan sa panimalay sa akong higala. Bisan pa man sa pagpangayo og pasaylo apil na ang inahan sa maong helper, iya gihapon gipapahawa ang helper. Ang helper adunay silingan nga pulis. Ambot og unsay gisumbong ngadto sa maong pulis kay ang pulis misalida man ug nanghulga sa pamilya sa akong higala.
Giila ang maong pulis nga si Police Corporal Josephus Ronnie Magdalera, silingan sa helper diha sa Kasambagan apan atoa madestino sa Ayungon, Negros Oriental. Ambot unsay nakaon aning maong pulis nga inay adto molaban sa biktima sa kawat, didto naman hinuon molaban sa kawatan. Nasuta diay nga kining maong pulis protector sa mga badlungon diha sa ilang lugar sa Kasambagan.
Ang akong higala, mireklamo sa kadagkuan sa kapulisan batok ning maong pulis protector gumikan sa pagpanghulga nga iyang gihimo. Gani miabot na sa Camp Crame ang iyang reklamo ug mismo ni PNP Chief Gen. Oscar Albayalde nahibawo na kay duna man usay koneksiyon ning akong higala. Pagka-abusado ning pulisa. Mao siguro ning hinungdan nga toa madestino sa layo kay abusado.
Dili pa lang dugay, dunay upat ka mga pulis sa Ayungon nga gidagit ug gipamatay sa mga NPA sa maong lugar. Atensiyon, PRO 7 Director Debold Sinas. Mas maayo siguro nga imo ning ipa-imbestigar, Sir. Kay kining maong klase sa pulis angay lang papahawaon sa organisasyon. (bobbygnalzaro@gmail.com)