PIPILA na ka mga adlaw nga wa na mo-function ang mga traffic light sa daghang major nga mga eskina sa Dakbayan sa Sugbo. Kini tungod sa kakaraan na sa traffic system. Nag-edad na kini og 30 ka tuig.
Kaniadto, gipasigarbo sa Dakbayan sa Sugbo ang Sydney Coordinated Adaptive Traffic System (Scats) nga maoy labing moderno sa tibuok nasod. Apan makauuwaw huna-hunaon karon kay ang silingan nga mga siyudad sa Mandaue, Lapu-Lapu ug Talisay nakapalit na og moderno ug digital nga traffic lights. Apan ang gihulagway nga queen city of the south dunay “karaan pang Mampor” nga traffic system.
Sud sa 30 ka tuig, gipasagdan sa Dakbayan sa Sugbo ang traffic system samtang nagkagrabe ang kahimtang sa trapiko ug nagkataas ang gidaghanon sa mga aksidente sa trapiko.
Kataw-anan ba o angay ikasagmuyo, ang gahin sa basura nagsige og tubo, labina sa pamunoan ni kanhi mayor Tomas Osmeña. Wa mahinumdomi ang traffic system nga ilisanan na.
Sa nakalabay nga walo ka tuig, nagsige usab og saka ang gahin sa senior citizens kay gawas nga nagkadaghan, gipaumentuhan kini. Kon nagahinan sa Siyudad ang basura ug senior citizens, angay usab unta nga gitagan-an og dakong pahat sa budget ang traffic system sa Siyudad sa Sugbo nga wa kinahanglanang ilisan kada tuig.
Makauuwaw huna-hunaon nga ang Siyudad nga dunay mas dakong income ug mas klarong mas adunahan sa tibuok Sugbo, nagmantinil og karaan nga traffic system. Ang iyang mga silingan naka-upgrade na.
Unsaon, ang naa kanunay sa huna-huna sa mga lider mao ang pulitika. Giawayan kanunay ang South Road Properties (SRP) ug uban pa nga may kalabutan sa pulitika. Gikalimtan ang trapiko nga dunay dakong epekto, di lang sa taga Dakbayan sa Sugbo, kon di sa kinabag-ang mga Sugboanon.