SERYUSO nga nagbansay-bansay ang 24 ka mga responders niadtong Miyerkules atubangan sa Command Center sa dakbayan sa Mandaue.
Pagtuon kon unsaon paghatag og first aid sa mga nadisgrasya, pag-check sa blood pressure ug pag-atiman sa mga biktima maoy unang gikat-unan sa responders.
Ang nag bansay kanila mao si Jose Juvy Sungahid sa City Disaster Risk Reduction Management Office (CDRRMO) sa Siyudad.
Matod ni Sungahid nga matag semana dunay nagkalainlaing programa ang ilang angay agian aron sila makalampos ug hingpit nga matawag nga responders ug mamhimong makatrabaho sa CDRRMO.
“Kinahanglan gyud ni nila ang training kay ang unang priority nato ani ang safety sa atong kaugalingon ug safety sa people. Kini sad aron mahibaw sila sa sakto nga mga procedures,” pagpasabot ni Sungahid.
Gitudluan usab sila sa pagresponde kon dunay insidente sama sa sunog.
Apan alang sa pangu sa CDRRMO, Felix Suico, kinahanglan nga makasugakod kining responders sa training tungod kay bisan kon sila makamao, kinahanglan gihapon ang maayong panglawas ug maayong desisyon panahon sa kalamidad, trahedya o disgrasya. (ANV)