USA ka drug personality nisukol sa mga pulis, napusilan apan usa ka residente naangol human maigo ang tiil sa Sitio Eagles, Barangay T. Padilla, dakbayan sa Sugbo kagahapon, Huwebes, Agusto 15.
Mga sakop sa Parian Police Station sa Cebu City Police Office (CCPO) mao ang milusad sa buy-bust sa dapit.
Gikataho nga kalit nikuha sa usa ka kalibre .45 nga pistola ang suspek nga giila lang sa ngan nga "Darwin" ug namusil sa mga pulis.
Nibawos ang pulis nga niresulta sa pagkaigo ug pagkatumba ni Darwin, kinsa nibangon ug mamusil na usab.
Sa ikduhang pagpusil sa pulis, nibanda ang bala nga miigo sa tiil sa usa ka residente nga si Marquin Claro, 32.
Si Claro naglingkod sa tindahan nga nahimutang sa atbang sa dapit nga nahitaboan.
Si Darwin gidala sa tambalanan ug wa pa mahibaw-i unsa ang kahimtang niini.
Usa ka Francis Degran, 40, taga T. Padilla, nasikop usab atol sa buy bust. (AYB)