ANDAM ang mayor sa syudad sa Talisay nga mamahimo nga taytayan tali sa kadagkuan sa Land Transportation Franchising and Regulatory Board (LTFR0B) ug sa mga operator sa kolorum nga sakyanan.
Ang kolorum nga mga sakyanan ang gireklamo sa usa ka concerned citizen ngadto sa government hotline nga 8888, nga namasahero diha sa kadalanan sa South Coastal Road (SCR) gikan sa Talisay City padung sa Cebu City ug vice versa, nga walay prangkisa o bisan unsa nga permit.
Nadawat sa kagamhanan sa syudad sa Talisay ang sulat gikan sa Department of Interior and Local Government (DILG) provincial office kalabot sa reklamo ug nga hatagan kini dayon og kasulbaran.
Niadtong Martes sa buntag, Agusto 13, gipakigtagbuan ni Jonathan Tumulak, ang City of Talisay Traffic Operations Development Authority (CT-TODA) ang mga operator ug driver sa mga kolorum nga sakyanan.
Kinsa niangkon nga moabot og napulo ka byahian ang ilang mahimo, ug nga matag byahe aduna kini dili mominus sa napulo ka mga pasahero, ilabi na mga multicab, van ug sports utility vehicle nga sakayanan.
Hinungdan nga aron sa pagtabang kanila ug sa mga apektadong’ pasahero, niuyon ang mayor nga mokontak sa pangulo sa LTFRB-7, kini aron mismo ang taga LTFRB ang mopasabot sa ilang kalapasan.
Ug nga makahatag tubag sa ilang mga pangutana, ilabi na kalabot sa hangyo nga mamahimo sila nga legal.
Gikatakda na nga karon hapon, Agusto 16, himuon ang pagpakigtagbo ni LTFRB-7 director Eduardo Montealto ug sa 50 ngadto sa 60 ka operators.
“Ako gitawag si Direktor Montealto ug niuyon siya nga makigtagbo, then ato gi-ask si Joy (Tumulak) to contact sa mga operator, naa naman siyay lista ato, ipatawag namu, aron magka-estorya sila ni Montealto, para makaklaro sila kon unsay angay nila nga buhaton, unsay pwede, unsay dili kay mas maayo ng LTFRB ang ilang maka-estorya, para maklaro na gyud,” saysay ni Gullas.
Apan sa pagkakaron nga wala pa sila hingpit nga nahinabi sa taga LTFRB, matud ni Gullas nga mopatuman lang gyud sila sa ilang lagda sa trapiko nga gidili ang pagpataka og parking sa daplin sa dalan diha sa national highway.
Samtang, kalabot sa pagsita sa mga mang-pick-up og pasahero, wala pay gahum ang lokal nga kagamhanan nga maoy mosita ug mo-penalize kanila, kundi ang LTFRB lang.
Mao kini hinungdan nga ang Talisay City government nakig-alayon sa LTFRB aron mapatuman ang gitinugha sa nga dayalogo. (FMD)