MGA dagkong sakyanan ang gidid-an una sa pag-agi diha sa mga dan nga gisugdan na sa pag-ayo sa Department of Public Works and Highways (DPWH) sa siyudad sa Talisay.
Niadtong Martes sa buntag, Agusto 13, gisugdan na ang paglungag sa nga karaang semento, alang na sa bag-ong pagpa-semento ug pagpa-aspalto sa dan.
Gikan kini sa taytayan nga maoy nagdugtong sa barangay Mohon ug Dumlog, hangtud na sa eskina sa dan Fidel Bas ug dan Cong. Bacaltos.
Ang maong proyekto iya sa DPWH, diin una kini gitagan-an og lima ka bulan.
Apan matud ni Jonathan Tumulak, pangulo sa City of Talisay-Traffic Operations Development Authority (CT-TODA), nga gipasalig sa DPWH, nga humanon nila ang proyekto duha ngadto sa tulo ka bulan.
Kini human sa pahimangno sa mayor sa talisay, Gerald Anthony Gullas nga dili na gyud masusama pa sa pagpatrabaho sa taytayan sa Mananga nga hangtud karon wala pa hingpit nga naagian.
Ug kay nakig-alayon na ang DPWH ug kontraktor niini ngadto sa CT-TODA, ilabi na alang sa himuon nga traffic plan, nga makatabang nga dili makabalda sa trabaho, ug nga dili ra huot ang trapiko sa maong mga gipang-ayo nga dalan.
Gawas nga susama og zigzag ang pagpatrabaho, o ang unang 50 metros trabahuon, ang sunod 50 ang dili una buhaton, aron mamahimo pa maagian.
Apan alang lang sa mga light vehicles ang mamahimong’ makaagi.
Ang mga dagkong sakyanan o mga truck, ang wala tuguti una nga moagi sa maong gipang-ayo nga mga da’n.
Strikto usab nga gibawal ang pag-park sa mga daplin sa da’n, bisan pa n mga tricycle.
Aduna hinuoy mga traffic enforcer nga nag-man sa trapiko, gawas sa traffic signages nga gipahimutang sa dan. (FMD)