Grab mihangyo sa LTFRB 7 nga madugangan sila og 1,500 ka units

TUNGOD sa kakuwang sa units ug kataas sa demand, mao kini ang rason nga makasinati og price surge ang Grab Car users sa Sugbo.

Tungod niini, gihangyo karon sa transportation network company (TNC) nga Grab ang Land Transportation Franchising and Regulatory Board (LTFRB) 7 nga mapun-an ang mga padaganon nga units sa Sugbo.

Huwebes, Agusto 15, dihang nakigdayalogo ang transport network vehicle service (TNVS) drivers, transportation network companies (TNCs), inubanan sa mga operator sa taxi, bus, ug mga pasahero ngadto sa kadagkaon sa Land Transportation Franchising and Regulatory Board (LTFRB) 7 aron pagahisgutan ang maong petisyon.

Uyon ang tanang hingtungdan nga dugangan og laing 1,500 ka units sa TNVS drivers ang Sugbo subay na usab sa nagkataas nga demand niini.

Kasamtangan nga 1,500 lang ka mga unit/slot ang gitagana sa LTFRB alang sa Sugbo diin giisyuhan kini nila og Provisional Authority (PA) ug Certificate of Public Convenience (CPC).

Matod ni LTFRB 7 Regional Director Eduardo Montealto Jr., nga uyon ang tanang sector nga nitambong sa dayalogo.

Naghuwat nalang sila sa manifesto gikan sa mga TNCs ug TNVS drivers aron matun-an kini ug makagama na sila sa ilang rekomendasyon ug masumiter sa ilang ulohang buhatan.

“After adto maghatag ta og recommendation after sa atong consultation kay represented man tanan sector naay taxi, naay commuter, naay student, naa pud operator, naa pud bus operator,” si Montealto nagkanayon.

Giklaro ni Montealto nga kadto rang mga existing nga wala malakip sa unang 1,500 ang i-accomodate nila aron dili na madani kining uban nga mopalit pa og bag-o unya morehistro.

Ang head sa City Operations sa Grab Cebu nga si Raymond Dejan nagkanayon nga apektado ang ilahang drivers tungod kay lagyo ang pick-up ug gamay ra ang drivers.

Gani nibutyag kini nga alkanse og P500 ngadto sa P1,000 sa ilang kita ang mga TNVS drivers itandi kaniadto sulod kini sa 12 ka oras nga biyahe o kining gitawag nila nga full time.

“Kung di ma approve ang 1,500 kay mosamot kanihit ang available nga sakyanan. Less chances to be allocated so mas dugay nga mag-huwat ang pasahero,” si Dejan nagkanayon.

Dugang niini nga aron dili malikayan ang price surge, mas maayo nga daghan ang magdagan nga units.

Gani modagan og mas taas nga oras ang ilahang TNVS drivers aron makabawi sa ilang alkanse.

Suportado usab sa tinun-an sa Southwestern University nga si Noldith Etcobanez, 24, ang pagdugang og units o slots sa TNVS drivers sa Sugbo tungod siya mismo apektado sa kanihit sa Grab drivers.

Matod ni Etcobanez, kinsa tinun-an sa Optometry nga karon nga ga-internship na siya kinahanglan niya nga magbalikbalik sa ilang eskwelahan ug usa ning Grab nga gamiton nila sa iyang classmates kay gawas sa madali sila, luwas kini nga sakyan.

Gani, iyahang i-send sa iyang mga ginikanan ang screenshot sa iyang booking aron makahibaw kini sa detalye kon asa na siya paingon. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph