MILUGWA nga kampeyon sa 34th Kadayawan Sports Festival Invitational Basketball Tournament 2019 ang National University (NU) Bulldogs, gipildi ang Araw ng Dabaw 2019 champion De La Salle University (DLSU) Green Archers, 77-70, sa duwa nga gihimo sa Almendras Gym Davao City Recreation Center, Miyerkules sa gabii, Agosto 14.
Ang NU nga gigiyahan ni coach Jamike Jarin, nanguna sa iskor, apan giapas sila sa Green Archers aron mas mapaduol ang lamang.
Apan wa patarog ang NU inubanan pa sa pagminangtas sa court ni Dave Ildefonso sa payoff period.
Si Ildefonso, nga giilang most valuable player (MVP) sa upat ka adlaw nga Samahang Basketbol ng Pilipinas (SBP) 11-sanctioned cagefest, mihimo og 12 puntos, diin si Miguel Oczon mibuslo og 14 puntos.
Si Jarin giilang best coach.
Siya ug si Ildefonso midawat og tag-P5,000 matag usa.
Si NU assistant coach Dennis Llames nagsulti sa SunStar Davao, “The team was just motivated to bounce back from our opening game loss against La Salle and we also wanted to end the Davao tournament with a win.”
Niya, nga ang Bulldogs “made a job well done.”
“Hopefully ma-invite kami uli next year,” dugang niya.
Si Andrei Caracut mihimo’g 14 puntos alang DLSU, nga regular na sa liga sa Davao ug maoy paborito sa kadaghanan nga modaug.
Si Acting Mayor Sebastian “Baste” Duterte, SBP 11 regional director ug Presidential Assistant for Sports Glenn Escandor ug Atty. Mans Carpio mitunol sa tropeyo ug cash prizes sa mananaug.
Ang NU mipauli og P100,000 samtang ang DLSU nga runner-up midawat og P60,000.
Ang Southwestern University (SWU)-Phinma Cobras, nga nakalingkawas sa 77-74 nga kadaugan kontra University of the Visayas (UV) Green Lancers sa ilang bugno sa ikatulong pwesto, mikuha og P40,000. Ang UV midawat og P30,000.