DAGHAN ang nangutana nga mga higala nako ngano daw emosyonal kaayo ang akong mga posts sa Facebook, ug dayon ko silang gitubag nga ang tanan, drama lamang.
Nahimuot ang bisan kinsa nako nga higala kung madunggan akong tubag, ug diha sa’y uban nga di gyud motuo nga drama lang, kay kabalo daw sila sa unod sa akong pagbati.
Giingnan ko dayon sila nga kung kinsa ang nakabalo sa akong pagbati, sila kadtong makasabot sa akong mga posts, apan ang dili, nakasabot sab sila nga namakak ko dihang miingon ko nila nga usa lamang ka drama tanan.
Kini ba ang giingon nga bisan nasakitan ka sa usa ka panghitabo, ipakita gihapon nga daw wala kita natandog sa nahitabo kanato?
Sa laktod, kining giingon nga, naka-move on na, pero nagpabilin pa diay ang samad sa kasingkasing, gumikan kay di kita gustong mawala ang usa ka tawo sa atong kinabuhi, di ba?
Husto, apan lisod nga dawaton ang panamilit labi na og di ka gustong mahitabo kini taliwala sa inyong masadya nga panag-uban. Unsa sab kaha’y bunga sa kalit nga panamilit nga gitabanan og kasilag ug kasuko? Mabati sab ba kaha ang kamingaw kaniya?
Sa akong tan-aw mabati gihapon labi na og nahigugma gyud ta sa usa ka tawo nga mibulag nato, ug labi na sa mag-uyab nga kalit gibulag sa selos; sa wala nay gana kay wala nay madawdaw sa imoha; ug sa giingong crime of passion (ang krimen bunga sa naghinobrang kasuko).
Kay kung mahitabo kini, ug di na mabalik pa, mapasalamaton gihapon ta kanila, gumikan nakat-on kita sa daghang mga butang sa kinabuhi niadtong nakauban pa nato sila.
Gani diha ko’y higala nga gihatag gyud niya ang gikinahanglan sa iyang hinigugma, unya miabot ang punto nga iyang gipanid-an ang batasan ugaling wala siya’y mahatag.
Gisulayan niya, ug didto nakita gyud ang tinuod nga kolor, nga wa diay gugma kaniya iyang partner, gipanguwartahan ra diay siya, suma niya, konsensya nalang ang mopukaw kaniya.
Sa sambingay bitaw, motugpa man gyud ang alibangbang sa nagbukad pa kaayo nga buwak, kay kung wala na kini mibukad, wala nay alibangbang nga motugpa niini, kay di naman niya mapuslan, palaya naman.
Mao nang kung duna man tay hinigugma, masayran lang gyud diay nato nga nahigugma gyud sila, kung mapakita gihapon nila ang ilang walay kondisyon nga gugma luyo sa kasakit ug kalisod sa mga higayon.