NAGKAGULIYANG ug napuno sa reklamo gikan sa mga investors sa Rigen Wellness ang ilang unang batch sa refund nga gihimo sa Sun’s Garden sa Tagum City Huwebes, Agosto 15.
Sa mga Facebook post ug videos nga nagbaha sa online, makita ang gatusan ka mga investors nga ang uban gikan pa sa lagyong dapit, sama sa Surigao, Compostela Valley ug uban pa ang midugok sa dapit.
Ang Rigen nga unang nagpahibawo sa ilang himuong refund, mipaguwa og listahan sa suma pa maoy modawat sa iuli nga kwarta.
“Mohangyo lang mi sa mga wala natawag paabot lang ta sa sunod nga batch. First batch pa lang ni. Kadtong wala sa listahan paabot lang sa sunod namong update nga gi-post sab nato sa atong social media,” suma sa usa ka taga Rigen nga miatubang sa mga tawong midagsa sa Sun’s Garden.
Apan mga investors nagyawyaw gihapon tungod sa matag tawag sa ngalan wa may moduol tungod wa sa among lugar.
Pasiaw pa sa uban nga tawgon kadtong mga buhi, tungod may nagtuong mga ngalan sa patay suma pa ang gilista, ug drama ra ang giingong refund.
“Magsige sila og panawag sa mga wala diri, kanang naa diri ang ilang asikasuhon nagdala man mi og resibo,” sigun sa usa ka investor.
Gikaitok sab sa mga investors ang suma pa P5,000 lang ang ibalik nga refund kanila, taliwala sa dakong kantidad nga ilang gihatag.
“Maayo kaayo sila manulti adtong nag-pay-in mi pero karon kana ra ilang ibalik sa amoa, naunsa naman na sila, i-uli na nila oi!” segunda sa usa ka investor sa kompanya.
Sa pikas bahin didto sa Matanao, Davao del Sur, nag-alburoto sab ang mga investors Rigen way klaro ang “payout” nga gitakda sa kompaniya nga giingong nagsugod Huwebes.
Nasayran nga wa giapil ang Matanao Branch sa listahan nga gipaguwa sa Rigen sa ilang official Facebook Page hinungdan nga gisapot ang tanan niining miyembro.
Sumala ni Bernard Gortina, head agent sa Matanao Branch, nga gitakda na nila ang pagpasaka og kasong “large-scale estafa” batok sa mga tag-iya sa Rigen Wellness 2.0 human nga padayong wa gitagad ang ilang “last and final demand letter” nga gipadala sa ilang abogado niadtong Hulyo 5.
Subay sa gipahibawo, nagsugod na ang refund kagahapong adlawa apan giuna niini ang Island Garden City of Samal (Igacos).
Apan, daghan sa mga sakop sa Matanao Branch ang nagtuo nga dili makaya pag-uli ang tanang kuwarta sa tanang sakop niini.
Ang venue sa refund gahapon sa Rigen gibahin sa tulo ka hugna, ang Area 1 nga gilangkuban sa Digos, Gensan ug Matanao didto sa 2512 Purok Manggahan, Tres de Mayo, Digos City.
Ang Area 2 sa venue nga nanglangkub sa San Francisco ug Bayugan didto sab sa Gift Gallery, Bgry. Uno San Francisco, Agusan del Sur.
Samtang ang area 3 nga mao ang Sun’s Garden naglangkub sa Apokon, Asuncion, Carmen, Kalamboan, Lapulapu/Admin, Mankilam, Nabunturan, MCC, Panabo, Quirante Dos, Samal, SObrecary, Sto. Tomas, Tipaz.
Suma pa nga ang refund sa Rigen himuon matag Martes ug Huwebes. (Rhona Goc-ong-Villariasa/Orlando B. Dinoy)