Wa nay irekomendar dugang ‘maximum security zone’



MGA awtoridad di morekomendar og dugang “maximum security zone” area sa dakbayan.

“We are also looking for other areas, but ayaw kasi nating mangyari na mag-declare tayo and we cannot implement it,” pagtin-aw ni Task Force Davao commander Colonel Consolito Yecla niadtong Huwebes, Agosto 15, sa dihang gipangutana kon ang Roxas Avenue, ilabi na ang Roxas Night Market, kuwalipikado nga ideklarang ubos sa “maximum security zone”.

Ang Task Force Davao maoy usa sa mga puwersa nga security forces kinsa nagrekomenda alang sa deklarasyon sa San Pedro Square isip “maximum security zone” aron nga maseguro ang kaluwasan ug seguridad sa publiko batok sa mga hulga.

Kahinumdoman nga ang Konseho sa siyudad nipasar niadtong Agosto 6 og resolusyon nga nagdeklara sa San Pedro Square isip “maximum security zone” kon diin “access” kontrolahon pinaagi sa “entry point” ug limitahan sa mga awtoridad, igong screened personnel ug awtorisado ug giubanan nga mga bisita, ug i-monitor 24 oras matag adlaw, pito ka adlaw matag semana pinaagi sa peace-keeping forces.

Gisutli ni Yecla nga atol sa iSpeak media forum sa City Hall, ang implementasyon “will be put to a test” kay ang siyudad kasamtangang nagsaulog sa ika-34th Kadayawan sa Dabaw festival.

Duha ka mga kinauyokang kalihukan sa kaugdahan himuon sa maong lugar: Indak Indak sa Kadayawan karong adlawa, Agosto 17, ug Pamulak floral float parade, Agosto 24.

Giangkon ni Yecla nga makasinati sila og kalisud sa pagsusi sa lugar, ilabi na sa mga lugar nga giparkingan.

“We have to inspect the cars and the motorcycles parked within the Square to ensure that there will be no vehicle with IED (improvised explosive device),” pagklaro niya.

Matud niya nga ang TF-Davao makig-alayon sa City Transport and Traffic Management Office (CTTMO) alang sa mga lugar nga himuong parkinganan, ilabi na ang mga motorsiklo.

Dugang pa ni Yecla nga ang iya sab nga mga tawo nihimo na og imbentaryo sa tanang motorsiklo nga gipanag-iyahan sa mga kawani sa lokal nga kagamhanan aron nga madeterminar ang bakgrawon sa tag-iya.

Ubos sa security zone, ang pagparking sa lugar i-regulate. Ang di transparent garbage bins idili sab aron nga maseguro mga eksplosibo di tagoan sa maong basurahan.

Sayo niini mga polisiya, sama sa “No Backpack Policy” ug “No Jacket Policy”, istriktong gipatuman.

Samtang si Davao City Police Office (DCPO), director Police Colonel Alexander Tagum, nagkanayon nga ila nang gikonsidera ang Roxas Avenue isip usa ka maximum security zone.

“Six months ago, we considered Roxas Avenue as a maximum security zone. That is why we established a sub-station with two officers and a minimum of 50 personnel fixed deployed there,” butyag ni Tagum.

Gikanayon sab niini nga ang mga tawo sulod sa merkado gibansay na sab isip “eyes and ears” batok sa bisan unsang kadudahan nga mga lihok.

Samtang sumala kang Tagum nga istriktong gipatuman ang “Culture of Security”, kon diin ang publiko “volunteer, report, remind, and participate” sa pagbantay sa siyudad, ilabi atol sa kasaulogan sa Kadayawan. (RGL/SunStar Davao)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph