ANG kainit sa udtong tutok dungan nga mipakusog sa kalayo nga miugdaw sa gatusan ka mga balay sa Purok 3, Isla Verde, Barangay 23-C, Poblacion, Davao City, Biyernes sa udto, Agosto 15.
Sanglit gama lang sa mga “light materials” ang sagad sa mga balay sa dapit, dali kining gilamoy sa kalayo nga molungtad sa lima ka oras nga pagbugno sa mga bombero una gideklara nga “fire under control”.
Sa pag-ulbo sa kalayo nga nagsugod sa usa ka balay sa Purok 3, gilayong nagkaguliyang ang dapit ug nangabot ang mga bombero apan dugay kining nakasulod sa mga kalye sa maong barangay gumikan sa kapiot sa agianan.
“Dali lang man ang mga bombero nakaabot. Ang kadaut lang, dugay silang nakasulod kay daghan kaayo’g mga naka-parking sa kalsada pasulod,” saysay ni Romnick Punzalan, residente sa dapit nga nahinabi sa Superbalita.
Usa ka residente sab ang nagsaysay nga dili unta modako ang kalayo kung wala pa ang mga tawo nga nagsamok-samok sa pagpasirit og tubig sa mga bombero.
“Nagsamok-samok gyud ning pipila ka mga silingan namo; mga osisero. Mo tabang nalang gyud unta sa pagkutay sa hose, pero wala. Nagbabag-babag hinuon,” ingon ni Beverly Mustapah kinsa naugdaw sab og apil ang iyang balay.
Usa sa mga gikasuko sa mga residente mao ang pagkawala sa ilang mga gamit diin gituohang gipangdala ra sab sa ilang mga kawatan nga silingan.
“Purya ra gyud sa mga kawatan namo nga silingan. Akong TV nga flat screen, gi kawat gyud. Basta pag-ulbo sa kalayo kay duol lang man sa akong balay. Abi nako’g gitabangan ko, diay wala. Gipangkawat ug wala nako kabalo asa gidala,” ingon ni Helen Mesias, 40-anyos.
Susama sab ang gisaysay sa usa sa mga nasunogan diin wala na siya kabalo kung asa gidala ang iyang refrigerator, TV, ug rice cooker, ug ang set sa iyang lamesa.
“Daghan gyud og kawatan namo nga mga silingan. Nahimulos gyud sila sa higayon. Sige lang, mo abot ra ang gaba nila,” naghilak nga pagsaysay ni Roselyn Hidalgo, negusyante sa palengke sa Agdao.
Atol sa sunog, si Barangay 23-C Kapitan Alimodin “Wating” Usman Al Hadj nagpunay sab og hangyo sa mga molupyo nga mo-evacuate na ug ihatag na ang tahas sa pagpawong sa kalayo ngadto sa mga bombero.
Gatusan
Sumala sa Bureau of Fire Protection (BFP) Davao City Fire District nga gatusan ka mga balay ang nanga-ugdaw diin gikan sa pagsuwat ning balita alas 2:30 sa hapon sa Biyernes, gikataho sa inisyal nga listahan ang 150 ka mga panimalay ang naugdaw.
Wala sab nawala sa imbestigasyon sa kabomberohan ang electrical-short circuit nga maoy usa sa mga hinungdan sa kalayo.
Gikataho sab nga dunay mga bata nga nagdula og posporo, ug dunay nabiyaan nga linuto. Apan, kining tanan wala una gituldukan sa kabomberohan sanglit nagpadayon ang ilang gihimong imbestigasyon.
Sa inisyal sab nga imbestigasyon sa BFP-Davao, mokabat kapin kun kulang P2,625,000 ang danyos sa sunog.
Tungod gama sa light materials, giubanan pa sa pausab-usab nga direksiyon sa hangin, ang sunog miabot sa 4th alarm.
CSSDO gilayong mi-aksyon
Ang City Social Services and Development Office (CSSDO) gilayong miaksyon diin ang Kusina ng Bayan midunol dayon og mga pagkaon sa mga biktima nga anaa nagtiner sa gym sa Mini-Forest.
Padayon ang gihimong validation sa mga social workers sa CSSDO sa mga biktima sa sunog aron mahatagan og hinabang pinansyal sa lokal nga kagamhanan sa Davao City. (SunStar Davao)