GIPARUBAHAN sa Philippine Basketball Association (PBA) kagahapon ang panagbaylo'g mga magduduwa sa Rain or Shine Elasto Painters ug Alaska Aces.
Sa maong kasabutan, buhian sa Elasto Painters si Maverick Ahanmisi baylo ni Ping Exciminiano ug usa ka 2019 first-round draft pick sa Aces.
Alang sa PBA Commissioner’s Office, makiangayon ra ang panagbaylo hinungdan nga dali kini naaprubahan.
Si Ahanmisi gipili sa Elasto Painters isip No.3 overall pick niadtong 2015 human kini nagduwa sa NCAA Division I sa Minnesota, USA. Sa iyang bahin, si Exciminiano gipili sa Aces sa 2nd round niadtong 2013 draft. (ESL)