MAGSAULOG ang Yaw-Yan ArDigma Martial Arts Federation, Inc. karong adlawa sa ilang 47th founding anniversary sa Yaw-Yan Cebu headquarters sa dalan Sanciangko, dakbayan sa Sugbo atubangan sa University of Cebu (UC) main campus.
Ang kalihukan sugdan pinaagi sa usa ka misa sugod sa ala 1:00 sa hapon.
Si Day-as Barangay Captain Freddie Esmas, kinsa usa sab ka mahiligon sa martial arts, maoy guest speaker sa kalihukan nga dungan nga isaulog sa tanang Yaw-Yan gyms sa tibuok nasod.
Nagkanayon si Yaw-Yan Cebu ArDigma founder Master Benigno “Ekin” R. Caniga, Jr. nga ipahigayon sab sa kasaulogan ang traditional baptismal rites ug sunodsunod nga demonstrations.
“Mag-abot ang mga karaan ug bag-ong members sa Yaw-Yan Cebu aning atong kalihukan. Usa kini nga celebration nga magpalig-on sa brotherhood ug sisterhood sa Yaw-Yan,” matod ni Master Ekin.
Ang Yaw-Yan usa ka klase sa martial arts nga lumad sa Pilipinas. (ESL)