GIPAABOT nga magdasok ang basketball fans sa lungsod sa Alcantara ug kasikbit nga mga dapit sa Big Dome karong gabii sa knockout championship match sa 2019 Alcantara Mayor’s Cup Inter-town basketball tournament.
Sa presstime, padayon pang nagkombati ang upat ka mga team sa cross-over semifinals.
Ang Naga City, ang team nga walay pildi sa Bracket A sa elimination series, 4-0, nakigsangka sa Moalboal, ang no. 2 team sa Bracket B nga may 3-1 nga baraha.
Samtang sa laing semifinal match, ang Argao (4-0), no. 1 sa Bracket B, nakigtinaktakay usab sa Badian (3-1), ang no. 2 team sa Bracket A.
Ang modaog ning maong mga panagsangka maoy mag-abot alang sa championship game samtang ang mga mapildi mao ang magsangka alang sa third place honor.
Ang makampiyon mouli nga may P100,000 samtang ang runner-up makabulsa og P50,000. Ang 3rd placer makadawat og P30,000 samtang P20,0000 alang sa 4th placer.
Napulo ka teams nga nagagikan sa mga kasikbit nga mga lungsod ang ningsalmot sa torneyo nga gipasiugdahan sa buhatan sa bag-ong napiling mayor nga si Mayor Fritz Lastimoso ug vice-mayor Felix Ferraren.
Ang kompetisyon maoy magsilbing usa sa dagkong mga kalihukan sa naghinangat nga kapistahan sa maong lungsod.
Miitsa sa ilang hugot nga suporta ang mga konsehal sa lungsod nga sila si Litoy Lambo, Larry Llenos, Belen Lobitana, Richard Pulgo, Julie Bayato, Andres Timtim, Marvin Pulgo ug Joshua Catapusan.
Si Rey Canoy, usa sa pangabaga sa mayor, maoy magsilbing commissioner sa liga uban sa iyang coordinators nga sila si Jay R Justiniane, Woodrow Sia, Gammy Lamosao ug Engr. Arthur Palencia. (JBM)