DUHA ka mga mananagat nga tulo ka oras nga nagpautaw-utaw sa kadagatan sa lungsod sa Liloan, amihanang Sugbo, giluwas sa mga tripolante sa usa ka motor tugboat human giingong naguba ang bangka gumikan sa kakusog sa bawod.
Luwas na nga nakauli ang duha ka mga mananagat human maunlod ang sakayan niini sa Bagacay Point Lighthouse niadtong Huwebes sa hapon, Agusto 15, 2019.
Gikuso-kuso sa dagkong mga bawod ang sakayan sa mga mananagat hinungdan nga nabali ang atubangan nga bahin dayon naunlod ang bangka.
Tulo ka oras nga nagpautaw-utaw sila si Edwin Entero ug Eleazar Formentera samtang nag-abay sa ilang sakayan.
Si 2nd Engr. Dexterious John Benolirao, usa sa mga tripolante sa tugboat, niingon nga gikan sila sa Ormoc City ug padulong sila sa FF. Cruz sa dakbayan sa Mandaue.
Mga usa ka kilometro gikan sa ilang nahimutangan, may nakita silang mga tawo nga nangayo ug tabang.
“Nag utaw-utaw na sila nya nangamay na sila. Sige na silag pangamay. Nakit-an na sila namo. Nya mao to nakit-an sa duty, unya nakit-an ni kapitan, among gikuanan ni Kapitan, giduol namo,” asoy ni Benolirao.
Gihulagway ni Benolirao nga nagkurog pa ang duha atol sa ilang pagluwas kanila.
Dugang pa niya nga mga dagkong barko na nga anaa sa lagyong bahin ug wa usa’y laing mga mananagat nga nakakita usab kanila hinungdan sa kadugay nila nga na-rescue.
“Nabali ilang bangka. Nag-abay nalang sila sa bangka, gikuso kuso gikuso kuso sa balod man gud”, dugang ni Benolirao.