NASAKITAN si Linda (tinuod ngalan gitago) dihang ginawong pagsukmat sa iyang higala nga siya maoy nagbuhi sa iyang bana ug pamilya kay wa may trabaho og naa ra sa balay iyang bana nga nag-atiman sa mga bata, tig-luto, laba, og limpyo sukwahi sa mga kasagarang gipang-himo sa mga bana.
Apan gipasabot ni Linda nga ang kaminyuon di contest kundi ‘give and take’, kung kinsa ang naay pangita maoy mohatag sa mga gastuhan ug mo-abag sa panginahanglanon sa balay labi na kung ang pares nga maoy nahabilin sa balay (ma bana o asawa) maoy nag-atiman sa mga inadlaw-adlaw nga buluhaton.
Sama natong mga asawa nga nanginahanglan og pagmahal, pag-atiman og pagsabot para molahutay og dugay ang relasyon, ang mga bana sab dunay mga gusto gikan sa ilang mga asawa nga usahay di nila mapadayag.
Una sa tanan kining mga bana nagkinahanglan og pagsalig gikan sa ilang mga asawa. Gika-ingon nga ang mga amahan maoy haligi sa panimalay maong dali kining ma-insulto ug kusog mo depensa sa kaugalingong kung mo tanyag ka og suhistiyon kon unsaon pagbuhat ang ingon. Sabta nga nagkinahanglan ni sila og taas nga kumpiyamsa gikan nimo nga makaya ra nila ang tanang panlalaki nga ginbuhaton sa balay bisag way abag gikan nimo o kang bisan kinsa.
Kasagaran sa mga bana nagkinahanglan og pagdayeg. Sama nato nga nagkinahanglan sa ilang pag-atiman og pagmahal, sila sab nagkinahanglan sa imong pagdayeg. Busa ayaw hikawi sa imong pagdayeg panahon nga sila nagpakitang gilas o katakos sa ilang trabaho o sa ilang gihimong pagtabang sa mga ginbuhaton.
Panagsa magkinahanglan sab kini sila og kaugalingong kagawasan maong tuguti kung usahay mokuyog o makipanlakaw uban sa ilang mga barkada . Ayaw sigihi og check-up sa iyang mga lakaw kay mapul-an kini og kanunay kang mag text o monitor.
Ayaw balibari kung motanyag kini og tabang kay mobati man kini sila nga kita nagkinahanglan sa ilang tabang.
Katapusan kining pakig-hilawas kay mao kini makapahugot sa relasyon sa magti-ayon.