SI PO2 Jobie Antipolo, kinsa napatay sa dihang napusilan atol sa ilang pagpanulis sa head guard sa usa ka security agency, gihulagway ni Police Regional Office (PRO) Director Brig. General Debold Sinas nga badlungon.
Makaduha na kini mag-absent without official leave (AWOL) ug makausa gitaktak na sa serbisyo, apan nakabalik ra.
Si Antipolo nakasulod pagkapulis niadtong 2006.
Pagka 2011 nag Awol kini ug natangtang sa pagkapulis.
Sa monitoring sa Philippine National Police (PNP), gidudahan siyang nalambigit sa mga pagpanulis.
Niapilar si Antipolo pagka 2013 ug nabalik sa trabaho ug gihukman nga masuspenso sulod sa 60 ka adlaw.
Human sa 60 ka adlaw nga pagsuspenso, nakabalik sa serbisyo si Antipolo.
Apan pagka Marso 2018, nag Awol na usab kini ug sigun sa record sa Intelligence Division sa PRO 7, nisuway kinig balik paglabay sa pipila ka buwan.
“Accordingly, dili maayo ang iyang back ground. Problematic siya and first siya nga na-drop from rolls. Na-dismiss sa 2011. Nakabalik siya. Na suspend kay nag appeal. Nakabalik siya 2013. From the first nga na drop from rolls, dismiss siya, wala na may sweldo. He was already involved in petty crimes, on holduping. Pero nag-appeal siya, naka balik,” butyag ni Sinas.
Niadtong 2018, ibalhin unta si Antipolo sa Regional Personnel Holding Admin Unit sa PRO 7 samtang magpadayon ang imbestigasyon labot sa report nga nalambigit siya sa pagpanulis ug pagpangawat.
Tungod niini, nimando si Sinas sa tanang intelligence unit nga monitoron ang tanang mga pulis nga nag-Awol.
Nabalaka siya nga ang mga pulis nga wa nay trabaho ug wa nay sweldo, mosulod og illegal sama sa pagpanulis ug mamaligya sa illegal nga drugas.
“Pagka police ka nya nag-Awol ka kay nag positive. Naa dayon ka sa watchlist namo. Ipa-monitor na ilang activities kasi most likely very high probability nga you will engage in anomaly kay wala naman kay sweldo. Adik ka pa. Aha naman ka mangitag support sa imong bisyo,” dugang ni Sinas.
Gipasusi niya kon pila ka mga pulis ang gipangpasakaan og mga kasong administratiba ug wala na mo report sa ilang trabaho aron mabantayan kini pag ayo.
Napasaka na usab sa Biyernes, Agusto 16, ang kasong robbery batok sa tulo ka gikatahapang mga tulisan nga nangadakpan nga mga kauban ni Antipolo. (AYB)