Mga barangay butangan og library: Gullas

PUBLIC library sa kabarangayan ipatukod sa kagamhanan sa Dakbayan sa Talisay ning tuiga.

Tawgon ang maong mga library og ‘Aksyon Agad Learning Center’. Di sama sa kasagaran sa mga syudad ug munisipalidad sa tibuok Sugbo nga duna kay usa ka daku nga public library ang anaa, tinguha ni Talisay City Mayor Gerald Anthony Gullas nga mapahimuslan kini sa kadagahanan, ilabi na sa kabarangayan.

Daan nang gitug-an sa mayor nga usa sa iyang walo ka prayoridad nga mga programa ug proyekto mao ang paghatag og nindot nga edukasyon sa mga Talisaynon.

Ang mga public library maoy usa sa nakita niya nga dakong makatabang makakab-ot sa iyang tinguha.

Sa pagpatukod, gipasabot sa mayor nga usa kini sa gihisgutan atol sa ilang budget call sayo ning buwana, diin i-cluster ang mga barangay, alang sa katukuran sa learning centers.

Aron aduna na silay usa ka lugar nga tun-an, basahanan ug himuanan sa research, di lang sa mga tinun-an lakip na ang mahiligon sa pagbasa og mga libro.

Gawas sa mga libro, gusto sa mayor nga naay computer sets nga adunay libreng internet nga magamit sa mga tinun-an alang sa ilang pagtuon.

Dugang sa mayor nga iyang hangyuon ang mga kompaniya nga naa sa Dakbayan nga motabang kaniya sa iyang plano pinaagi sa pag-donate sa mga learning centers, sama sa computer sets.

Tinguha sa mayor nga su’d ning tuiga, aduna nay mapatukod nga mga learning center, ilabi na nga nagsugod nang mga klase sa pampubliko ug pribadong tunghaan. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph