MOABOT sa 13 ka mga manhole ang gitabonan sa Department of Engineering and Public Works (DEPW) inabagan sa mga barangay opisyal sa Basak Pardo para di na masubli ang pag-awas sa baha nga nikalas og kinabuhi.
Niadtong Hulyo 13, nagduwa og bola si John Clark Ebua apan kalit lang siyang nabulasot sa manhole nga way tabon ug naanod sa baha hinungdan sa iyang kamatayon.
Sa pagkasunod adlaw, napalgan sa mga rescuer ang lawas ni Ebua pipila ka metros gikan sa iyang nabulasutan nga manhole.
Niadtong Hulyo 23, ang City Council nipalabang og resolution pinaagi ni Konsehal Dondon Hontiveros ug gisegundahan ni Konsehal Dave Tumulak para hangyuon ang DEPW pagtabon sa mga open culvert ug manhole.
Sa ocular inspection sa DEPW, nasuta nga adunay 13 ka abli nga mga manhole nga gikinahanglan nga ilang tabonan.
Ang uban niini gipang-ukab sa mga rescuer para makit-an si Ebua.
Kini nakahatag og peligro sa mga lumolupyo nga mag-agian sa dapit.
Si Mayor Edgardo Labella, kinsa niduaw sa mga rescuer, nimando nga tabonan ang abli nga mga manhole para dili na masubli ang gidangatan ni Ebua. (PAC)