MAKILALA, North Cotabato -- Gituohan nga mga kanhi kauban lang sa walhong grupo nga New People’s Army (NPA) ang niihaw sa usa ka rebel returnee alas 12:20 sa udto, Biyernes, Agosto 16.
Ang biktima giila nga si Arnulfo Cartalaba, 46, minyo, nanginabuhi isip habal-habal drayber, molupyo sa Barangay Biangan sa nahisgutang lungsod.
Samtang angol ang usa ka Arnold Gahil, 34, molupyo sa naasoy nga lugar atol sa pagpamusil.
Matud ni Makilala chief of police Major Arniel Melocotones nga sakay ang biktima sa iyang motorsiklo sa Purok 1A, Barangay Kisante.
Apan gisundan kini og upat ka mga wala mailhing lalaki nga giingong iya ra sab nga mga kauban kaniadto nga sakay og motorsiklo ug nagpusil kaniya.
Patay diha-diha dayon si Cartalaba human gitaopan og lima ka bala sa lawas samtang mga mamumuno daling nisibat paingon sa hilit nga dapit sa lungsod.
Naangol sab niadtong higayona si Gahil human nga maigo sa mga saag nga bala.
Gitumbok sa mga awtoridad si Cartalaba nga kanhi NPA apan mibalik sa sabakan sa balaod ug nakabenepisyo sa Enhanced Comprehensive Local Integration Program (E-Clip) sa gobyerno sa Police Regional Office 11, Camp Catitipan, Buhangin District, Davao City niadtong Enero 2019. (Edgar E. Fuerzas)