STA. CRUZ, Davao del Sur -- Padayong giimbestigahan sa kapulisan kon unsa ang motibo sa pagpatay sa usa ka magtutudlo nga nagsakay og traysikel apan gipusil paghidangat sa AMLO, Barangay Zone III, alas 4:45 sa hapon, Biyernes, Agosto 16.
Nailhan ang biktima nga mao si Felipe Capisos Niemes Jr., 52, ulitawo, maestro sa senior high school sa University of Mindanao Digos College ug molupyo sa Estrada 2nd, Barangay Zone II, ning siyudad.
Sa imbestigasyon sa kapulisan, gihulagway nga sakay ang biktima sa traysikel nga gimaneho ni Marvin Escol Diamona, 38.
Gisaysay sa drayber nga misakay ang biktima sa dalang Rizal, Barangay Zone III ug nagpahatud sa Sta. Cruz Integrated Bus Terminal apan paghidangat sa AMLO Subdivision, Brioso Street, susamang barangay, kalit na lamang nakadungog ang drayber og malanog nga buto sa armas ug nasuta nga ang biktima nga naa naglingkod sa likod nga bahin nahagba ug nagkadugo na.
Sa pagresponde sa kapulisan, narekober ang sa usa ka basiyong bala sa kalibre .45 nga pistola.
Wa na madala sa bay tambalanan ang biktima human nga namatay gilayon tungod sa samad pinusilan sa ulo.
Wa pay matudlong suspek ang kapulisan apan dunay mga miguwang hungihong nga gipanimaslan ang biktima tungod kay ang pag-umangkon niini kinsa giingong maoy nagdumala sa MCM investment company, nilayas dala ang dakong kantidad.
Hinuon, wa pay matumbok nga motibo ang kapulisan sa krimen sanglit nagpadayon pa ang ilang imbestigasyon. (Orlando B. Dinoy)