DILI momenos sa 20 ka mga istraktura ang naguba ug lima ka motorsiklo ang nasakmit sa tulo ka oras nga clearing operation sa mga sidewalk nga nakapalibot sa flyover sa Barangay Tabunok, Dakbayan sa Talisay, Sabado, Agusto 17, 2019.
Nangulo sa pagpanglimpyo sa sidewalk ang clearing division sa Talisay City Hall, kauban ang City of Talisay Traffic Operations Development Authority (CT-Toda), Talisay City Police Station ug mga barangay opisyal sa Tabunok.
Gihatagan og kahigayunan nga personal nga moguba sa kaugalingong katukuran ang mga tag-iya sa 20 ka simentadong istraktura nga nag-ali sa mga sidewalk.
Matud ni Jonathan Tumulak, pangulo sa CT-Toda, ihatag nila ngadto sa City Legal Office ang mga pangalan sa mga istraktura ug mga tag-iya niini aron mapadad-an og sulat atol sa kalapasan sa balaod ug pahibalo nga dapat na kining i-demolish.
Kon dili mopatuman ang mga tag-iya nga gub-on ang mga istraktura, ang clearing team na mismo ang mo-demlish niini sa sunod semana.
Sa gipahigayong opersayon gisita usab sa clearing team ang mga tricycle, motorsiklo ug mga 4-wheel vehicle nga nagpataka og park sa sidewalk. Nasakmit usab nila ang lima ka motorsiklo, kinsa nagmagahi sa pagsibog sa saktong parkinganan.
"Amo silang gipasabot nga nisunod lang ta sa programa sa gobyerno ug sa kamanduan sa pangulo sa nasud nga ibalik ang dan ug sidewalk sa public nga magamit sa hustong gamitan. Willing ra man sad sila, ni-cooperate ra man. Walay resistance," gitug-an ni Tumulak sa Superbalita Cebu.
Nihimo na og information drive ang clearing division ug gisegundahan kini sa mga opisyal sa barangay. (Superbalita Cebu)