MOKABAT sa 21,000 ka kilo nga basura ang nakolekta sa tibuok Guadalupe River atol sa unang hugna sa lapad nga pagpanglimpyo sa sapa nga gipahigayon sa Kagamhanan sa Dakbayan sa Sugbo sa Sabado sa buntag, Agusto 17, 2019.
Samtang ang 5,000 ka mga kawani sa Cebu City Hall nanglimpyo, ang Cebu City Environment and Natural Resources Office (CCENRO) nidakop sa duha ka mga lumolupyo nga nagpuyo duol sa sapa, ang usa nagdala og usa ka sako nga basura, nga ilabay unta sa sapa, matod ni CCENRO head John Jigo Dacua.
Matod ni Dacua nga ang duha giisyuhan og citation ticket sa paglapas sa Republic Act 9003 kun Ecological Solid Waste Management Act of 2000 ug mga City Ordinances 1361 (anti-littering ordinance) ug 2031 (no segregation, no collection of garbage).
Ang duha kinahanglan nga mobayad sa mga multa sulod sa pito ka mga adlaw ug ang kapakyas sa pagtuman nagkahulogan nga ang CCENRO makapasaka og mga kaso batok kanila tungod sa paglapas sa balaud, matod ni Dacua.
Gawas sa duha nga nasakpan, dunay mga enforcer nga ningbisita sa mga panimalay daplin sa sapa nga naisyuhan usab og citations human ang pipila kanila napalgan nga nanglabay sa ilang mga basura sa sapa ug ang uban naglabay sa ilang hugaw nga tubig direkta sa sapa. Matod ni Dacua nga ang mga multa nagsugod sa P1,000. (JJL)