PITO ka gikatahapang mga durugista ang nasikop ug nasakmitan og P1.3 milyones nga balor sa ginadili nga drugas.
Nasikop ang pito sa duha ka managlahing mga anti-drug operation sa kapulisan sa siyudad sa Talisay, Sabado sa kaadlawon, Agusto 17.
Duha niini giila nga mga high value target (HVT) sa Talisay City Police Station, kinsa nangasikop sa buy bust sa Barangay San Isidro, Dakbayan sa Talisay ala una sa Sabado sa kaadlawon.
Ang subject sa operasyon mao si Mark Manuel Deiparine, minyo nga nagpuyo sa San Isidro. Matod sa Talisay Police nga naila si Deiparine nga dinagko na nga mamaligyaay sa ilegal nga drugas ug nga anaa nay ngalan sa regional drug watchlist. (FMD)